Diretora Jerál Prestasaun Serbisu Saúde, Odete da Silva Viegas. Imajen Tatoli/Egas Cristovão

DILI, 29 janeiru 2021 (TATOLI)—Ministériu Saúde (MS) apela ba komunidade ne’ebé hela iha fronteira terrestre, liuliu iha Rejiaun Administrativa Espesiál Oe-cusse Ambeno (RAEOA), atu evita movimentu ilegál, tanba autoridade rejista pozitivu COVID-19 na’in ida iha rejiaun ne’e.

Koordenadora Komisaun Nasionál Prevensaun COVID-19, Ministériu Saúde, Odete da Silva Viegas fó sai apelu ne’e liu hosi konferénsia imprensa iha Palásiu Sinzas, Caicoli, sesta (29/01).

Notísia Relevante:Autoridade RAEOA izola pasiente COVID-19 na’in ida

“Ami husu ba komunidade ne’ebé hela iha fronteira atu kumpri nafatin medida ne’ebé fó sai ona, atu labele hakat liu fronteira ilegalmente, tanba ikus-ikus ne’e ita haree ema barak tama sai fronteira ho dalan ilegál,’’ Odete apela.

Diretora Prestasaun Serbisu Saúde ne’e konsidera hahalok tama-sai fronteira ho dalan ilegál mak sei fó risku boot liu ba família no komunidade tomak.

“Bainhira hakarak atu ita-nia rain livre hosi moras COVID-19, mai ita hotu kontribui hodi fó apoiu ba esforsu ne’ebé Governu halo ona,” nia konvida.

Ikusliu, Odete husu ba entidade tomak, atu kumpri nafatin medida prevensaun COVID-19, hanesan distansiamentu sosiál, uza máskara no fase liman beibeik.

Entretantu, Autoridade Rejiaun Administrativa Espesiál Oe-cusse Ambeno (RAEOA), izola tan ona sidadaun ida ho pozitivu COVID-19, iha sesta loron 29 janeiru 2021, no númeru baixa iha loron ne’e sa’e ba 19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here