Adjuntu Komisariu CAC ba Asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristovão

DILI, 29 janeiru 2021 (TATOLI)-Adjuntu Komisáriu Komisaun Anti-Korrupsaun (CAC) ba Asuntu Prevensaun no Sensibilizasaun, Luis Oliveira Sampaio, hateten tuir lei Medida Prevensaun no Kombate Korrupsaun (MPKK) ninia mekanizmu ba kargu xefia iha instituisaun Estadu hotu sei aprezenta deklarasaun rikusoin iha de’it  CAC.

Luis Oliveira Sampaio, esplika iha lei ne’e fahe tiha ona autoridade kompetente mak Tribunál Rekursu ho CAC hosi Prezidente Repúblika, Prezidente Parlamentu Nasionál, Deputadu, Primeiru-Ministru, membru Governu, no komisáriu ho adjuntu CAC to’o mai espesialista sira sei aprezenta rikusoin ba Tribunál Rekursu.

Notísia Relevante : Lei MPCC, kargu xefia aprezenta deklarasaun rikusoin

“Kargu Xefia sira hosi diretór jerál to’o mai sira seluk autoridade munisípiu, Provedór Direitu Umanu no Justisa (PDHJ), Komisaun Funsaun Públika, sei deklara rikusoin iha de’it iha CAC,” Luis Oliveira Sampaio esplika hodi responde  Agência TATOLI iha nia kna’ar fatin, Dili, sesta ne’e.

Nia hateten, iha lei ne’e mós regula ba funsionáriu sira ne’ebé servisu iha taxa no impostu hanesan Alfándega, Migrasaun, Aeroportu no Terras ho  Propriedade mós sei deklara rikusoin kada tinan tolu.

“Prosesu diskusaun ba preparativus lao intensivu loos ba formuláriu, gia esplikativu no agora hahú mós halo diskusaun kona-ba standar operational procedure (SOP) dokumentu orienta espesialista iha komisaun Anti-Korrupsaun  ne’ebé sei dezigna ba responsavel hala’o servisu rejistu deklarasaun rendimentu bens ninian ne’ebé lei ne’e ezije atu prepara,” Luis Oliveira hateten.

CAC mós hala’o hela diseminasaun ba lei MPKK ba iha instituisaun Estadu sira nune’e ajente públiku sira iha koñesimentu molok lei ne’e vigor iha loron 26 fevereiru, tinan ne’e.

Jornalista   : Nelson de Sousa

Editór        : Francisco Simões  

HAKEREK NO HATÁN

Please enter your comment!
Please enter your name here