Komísariu CAC, Sergio Hornai. Imajen Tatoli/Egas Cristóvão

DILI, 23 novembru 2020 (TATOLI)- Komisáriu Komisaun Anti-Korrupsaun (CAC), Sergio Hornai, hateten, bainhira lei Medida Prevensaun no Kombate Korrupsaun (MPCC) hahú vigora iha loron 26   fevereiru  2021, maka kargu xefia iha instituisaun Estadu hotu iha obrigasaun aprezenta deklarasaun rikusoin.

Notísia Relevante : CAC halo sensibilizasaun lei MPCC hahú hosi SEFOPE

Sergio Hornai, hateten, deklarasaun rikusoin ba  kargu xefia-sira ne’ebé mak hanesan Diretór Nasionál, Diretór Jerál inklui Xefe Departamentu-sira  ho razaun ema hirak ne’e hala’o servisu Estadu nian iha posibilidade no fasil tebes monu ba tentasaun korrupsaun.

Durante ne’e aprezentasaun rikusoin aplika ona ba órgaun  soberanu-sira, eis titulares no mós membru Parlamentu Nasionál-sira.

“Hanesan ita hatene iha lei MPCC iha artigu 29 to’o mai 30 ne’e fó obrigatóriu ba iha ajente públiku-sira ne’ebé ka’er hela kargu tantu polítiku no mós kargu xefia iha  funsaun públika iha liña ministerial, diretór nasionál to’o mai xefe departamentu iha obrigasaun atu bele  aprezenta sira-nia deklarasaun bens,” Sergio Hornai esplika  ba jornalista, ohin, iha salaun enkontru SEFOPE, Caicoli, Dili.

Nia hatutan, ba funsionáriu Estadu ne’ebé asume kargu xefia sei deklara sira-nia rikusoin, inklui sira-ninia família mai iha CAC bainhira lei ne’e hahú implementa ona.

Sergio Hornai, esplika, lei ne’e rasik iha Kapítulu II hosi artigu 27 to’o 58 ámbitu sei regula  hanesan ba deklarante-sira no mós ba agregadu familiar-sira, liu-liu sira asume funsaun.

“Se karik sira la aprezenta sira-nia deklarasaun bens ne’e signifika hatudu dezinterese iha lei hatete sei perda nia mandatu tanba la kumpre nia devér-sira,” nia afirma tan.

Iha kapítulu II Rejime Deklarasaun  Bens no Interese, artigu 28 obriga kualkér sidadaun ne’ebé asume karu públiku tenke deklara rikusoin.

Natureza hosi artigu ne’e ida ne’e ko’alia kona-ba ema sira ne’ebé atu halo deklarasaun, hanesan sira ne’e asume kargu polítika, deskrisaun ne’e mai to’o xefe departamentu-sira no funsionáriu-sira ne’ebé la’ós okupa kargu xefia, maibé pertense ba área sira konsidera altu risku ba korrupsaun.

Hanesan funsionáriu sira ne’ebé iha área judisiáriu mós tenke halo deklarasaun. Ezemplu mós ba funsionáriu-sira servisu iha área impostu, aprovizionamentu ba kontratu públiku, jestaun rai ho inspesaun nian tenke halo deklarasaun.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here