DILI, 29 janeiru 2021 (TATOLI) – Sekretária Estadu Juventude no Desportu (SEJD), sesta ne’e, tuur hamutuk ho órgaun Liga Futeból Timor – Leste (LFTL) hodi diskute no deside ona kalendáriu tentativa liga nian atu hala’o iha abríl nia laran.
“Ami ko’alia ona kona-ba preparasaun ita-nia liga nian tanba tinan kotuk ita la konsege hala’o, maibé agora tuir kalendáriu tentativa órgaun liga nian katak sei hala’o iha abríl nia laran tanba marsu sei iha jogu playoff entre klube sira iha segunda divizaun hodi buka klube rua sa’e ba primeira divizaun hodi kompleta klube 10,” Sekretáriu Estadu Juventude no Desportu, Abrão Saldanha, informa ba jornalista, hafoin enkontru ho órgaun liga iha edifísiu SEJD, Lecidere, Dili.
Notísia Relevante : SEJD-FFTL no LFTL sei diskute kalendáriu liga
Nia dehan, maski proposta kalendáriu LFTL hato’o on,a maibé bazeia mós ba pandemia Covid-19 bainhira númeru sa’e beibeik bele muda ka bele mós buka alternativu seluk.
“Proposta mak ne’e depende ba fatór sanitáriu ho kestaun preparativus. LFTL, órgaun ida ne’ebé organiza jogu naturalmente prepara kalendáriu no servisu sira ne’ebé atu halo,” Abrão Saldanha hateten.
Iha parte seluk, prezidente LFTL Nilton Telmo Gusmão, hateten maski daudaun ne’e iha hela pandemia Covid-19, maibé LFTL kontinua halo servisu hodi prepara kalendáriu tentativa ba liga nian.
“Durante tinan ida ita laiha liga, maibé tinan ida ne’e mós ita nafatin iha hela pandemia ida ne’e, mas ami tenta nafatin hodi halo servisu oinsá prepara kalendáriu, se ita nia estadu la dekreta tan estadu emerjénsia hodi permite ita hala’o atividade liga prontu nafatin no preparadu,” Nilton hateten.
Hanesan prezidente ba liga nia nafatin fó korajen ba klube hotu atu kontinua prepara an nafatin hodi hein liga ne’ebé sei hala’o iha tempu besik.
“Klube sira prepara an nafatin ba tanba SEJD no LFTL rasik komprometidu atu hala’o duni liga ne’e,” Nilton afirma tan.
Jornalista : Hortencio Sanchez
Editór : Francisco Simões