Sekretáriu Estadu Juventude no Desportu (SEJD), Abrão Saldanha, simu relatóriu hosi Prezidente LFTL, Nilton Gusmão. Imajen LFA/Dok.

DILI, 27 janeiru 2021 (TATOLI) – Sekretáriu Estadu Juventude no Desportu (SEJD), Abrão Saldanha halo ona komunikasaun ho Federasaun Futeból Timor-Leste (FFTL) no Liga Futeból Timor-Leste (LFTL) atu hahú tuur hamutuk diskute kalendáriu liga.

“Ami halo hela komunikasaun ho FFTL no órgaun liga para bele iha semana oin hanesan ne’e ami hala’o enkontru ida hodi ko’alia kona-ba jogu liga nian. Governu sei la abandona liga ne’e ida ne’ebé jogu ne’e sei hala’o duni iha tempu besik, tanba ita haree iha tinan kotuk liga la hala’o maibé tinan ida ne’e ita tenke hala’o,” Abrão Saldanha informa ba Agência TATOLI iha nia servisu fatin, Dili, kuarta ne’e.

Notísia Relevante : LFTL estuda hela lala’ok liga iha pandemia COVID-19

Nia dehan, SEJD kontente tanba FFTL mós iha rekursu ne’ebé natoon hodi ajuda Governu hodi finansia parte balu iha liga ne’e.

“Marsu, tinan ne’e, ita bele komesa ona liga. Governu preparadu no iha osan ne’ebé atu apoiu liga ne’e,” Abrão hateten.

Kalendáriu ne’ebé anunsia ona hosi LFTL iha dezembru tinan kotuk hodi loke ona janela transferénsia ba jogadór kada klube no fó sai mós oráriu fiksu ba liga. Tanba ne’e maioria klube iha primeira divizaun no segunda divizaun hahú halo kontratu ona ba jogadór lokál no internasionál.

Klube hirak ne’ebé daudaun ne’e fó ona kontratu ba jogadór sira mak hanesan Boavista FC Timor, Lalenok United FC, Karketu Dili FC, Assalam FC, Porto Taibessi FC, AS Ponta Leste no seluk tan.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here