Logotipu UNTL.

DILI, 29 janeiru 2021 (TATOLI)-Tribunál Distritál Dili (TDD), sesta ne’e, hala’o julgamentu ba arguidu  ho inisiál HW nu’udar funsionáriu kontratadu iha Departamentu Gráfika, Dirasaun Reseita, Universidade Nasional Timor-Leste (UNTL), ne’ebé deskonfia utiliza osan Estadu ho montante $8,388.00 ba interese privadu iha 2018.

Ministériu Públiku (MP) dedús akuzasaun no husu julgamentu iha prosesu komún ho intervensaun Tribunál Koletivu, tuir artigu 236 e 14 husi K.P.P., hasoru arguidu ho inisiál HW nu’udar funsionáriu kontratadu, iha Departamentu Gráfika, Dirasaun Reseita Universidade UNTL.

Notísia Relevante : Kazu UNTL, TDD rona auditór kámara konta

Tuir faktu akuzasaun ne’ebé MP aprezenta ba iha Tribunál katak iha auto indísiu sufisiente, arguidu HW nu’udar funsionáriu kontratadu, iha Departamentu Gráfika, Dirasaun Reseita, Universidade Nasional Timor-Leste (UNTL), hahú husi fulan Janeiru 2015 to’o fulan novembru 2018.

Iha  loron 13 agostu 2018, Diretór Nasionál Reseita UNTL ho inisiál LDL  aprezenta Xefe Departamentu foun Gráfika ho inisiál SC   ba iha funsionáriu hotu iha diresaun ne’e hotu no ba Xefe Departamentu sesante AM.

Iha loron tuir fali mai  14 agostu 2018, Xefe Departamentu foun bolu xefe departamentu sesante hodi husu ba nia kona-ba relatóriu atividade no finansa, durante ninia mandatu, ho objetivu atu hatene atividade saida mak halo ona inklui relasiona ho orsamentu gráfika nian, hahú hosi fulan janeiru  to’o agostu 2018 no  iha altura ne’ebá Xefe Departamentu sesante  responde katak nia  lahatene kona-ba relatóriu tanba durante ne’e osan la’ós nia mak kaer, maibé iha nia maluk funsionáriu   ho inisiál AJ mak kaer osan gráfika nian.

Iha loron ne’e kedas, Xefe Departamentu iha momentu ne’ebá bolu kedas parte hodi fó orientasaun prepara relatóriu, maibé  AJ responde katak nia parte  labele halo relatóriu, se kuandu osan gráfika nian durante nia lisensa maternidade, hahú hosi loron 22 janeiru  to’o 27 abríl 2018, tanba arguidu HW seidauk entrega ba nia liman.

Rona tiha informasaun ne’ e, Xefe Departamentu Gráfika ne’e komunika kedas ba iha Diretór Nasionál Reseita UNTL nian, atu kria enkontru urjente kona-ba relatóriu orsamentu gráfika nian, no iha altura.

Iha  loron 18 agostu 2018,  Xefe Departamentu Gráfika husu ba arguidu HW katak osan gráfika nian ne’e tanba saida mak fulan hira ona la entrega osan ne’e ba Estadu, maibé arguidu responde katak osan ho montante $8,388.00 tanba barak liu nia labele rai iha uma, maka nia lori osan refere ba asegura iha ninia konta privadu iha banku BRI ho durasaun fulan 6 nia laran labele foti no osan ne’e foin bele foti iha 26 outubru 2018.

Bainhira to’o iha  loron 26 outubru 2018, Xefe Departamentu hein iha ofísiu Departamentu Gráfika, maibé arguidu HW la mosu, nune’e telefone ba arguidu  responde sei trata osan refere iha banku BRI no liu tiha loron ida, iha loron 27 outubru 2018, kontaktu fali arguidu  HW nia dehan katak lisensa lai loron 5 atu ba halo lia iha Cailaco, Bobonaro, no osan refere nia foti ona no nia promete iha loron  05 novembru 2018, foin atu entrega ba  Xefe Departamentu Gráfika maibé ikus mai la entrega.

Arguidu HW la entrega osan to’o ohin loron, maka iha loron 24 dezembru 2018, reitór UNTL hatún orden servisu nian ba iha parte Administrasaun Jerál atu halo keixa kazu ne’e ba PNTL, aleinde ne’e iha loron 16 janeiru 2019, tuku 15h:20,Xefe Departamentu Gráfika mós denunsia kazu refere iha PNSIK.

Iha loron 22 fevereiru 2019, tuku 14h:55, arguidu presta ninia deklarasaun iha PNSIK hodi deklara katak loos duni nia dehan ba nia superiór sira katak osan ho montante $8,388.00  ne’e nia rai iha banku BRI, maibé tuir realidade arguidu HW konfesa katak osan ne’e nia uza tiha ona ba nia banin mate.

Arguidu hatene katak osan ne’ebé estudante UNTL sira selu ba sira nian enkadernasaun monografia, hahú hosi janeiru  to’o abríl 2018, ho montante  $8,388.00 ne’e entrega ba arguidu tanba ninia funsaun nu’udar funsionáriu iha Departamentu Gráfika UNTL nian, maibé arguidu aproveita fali osan Estadu nian ne’ebé iha ninia pose, ba fali dalan ne’ebé ilejítima, hodi apropria tiha montante osan refere ba ninia proveitu rasik.

Arguidu mós ho forma ne’ebé  livre konsiente no deliberada ho propózitu konkretizadu hodi uza osan refere sem autorizasaun hosi ninia superior sira, ba ninia interese partikulár hodi hetan benefísiu ilejítimu no arguidu hatene katak ninia hahalok ne’e kontra lei, maibé arguidu atua nafatin hodi hetan ninia rezultadu.

Ho faktu sira ne’ebé hakerek ona iha leten, arguidu HW hanesan autór material ho forma konsumada, ba konkursu real ba krime pekulatu, ne’ebé previstu no punidu iha artigu 295 n. 1 no krime administrasaun irregulár ba verba públika, ne’ebé previstu no punidu iha artigu 319 n. 1 e 2, konjuga ho artigu  35 husi Kódigu Penal Timor-Leste nian.

Ministériu Públiku, reprezenta Estadu Timor-Leste, tuir artigu 71 e 72 hosi KPP, 152 hosi KRDTL, artigu 3 estatutu ba Ministériu Públiku – Lei 14/2005, de 16/09, mós  deduz pedidu ba indemnizasaun sivíl hasoru Reu: ho fundamentu ne’ebé konsta ona iha akuzasaun laran;

Autor (Estadu Timor-Leste) reklama ba reu, tenke rekoopera fila fali prejuízu ho montante global  $8,388.00 iha likida iha ezekusaun ba akórdaun  no kuantia sira ne’e, sei akresida mós ho jurus  de mora  vensidu hahú hosi  loron prátika faktu ilísitu sira iha leten, to’ o integral pagamentu;

Pedidu indemnizasaun sivíl ho nia fundamentu legál tuir artigu 720 no. 2, 114° n 2, 2250 husi K.P.P

Ho termu sira ne’e, no mós direitu sira seluk, husu julga provadu no presedente ba pedidu ida ne’e, ho ninia konsekuénsia katak kondena reu atu selu osan ho kuantia $8,388.00 ho títulu indemnizasaun, akresida ba jurus de mora vensidu hosi loron prátika ba faktu sira refere iha leten to’o integral pagamentu remata, tuir art.° 4179, 430°, 493°husi Kódigu Sivíl Timor-Leste.

Liuhosi audiénsia julgamentu ne’e arguidu HW konfesa ho integralmente ba Tribunál katak faktu akuzasaun sira ne’e  loos hotu tanba momentu ne’ebá nia parte iha nesesidade  obriga tanba nia banin mate nune’e nia uza tiha osan Estadu refere.

Nia haktuir, osan sira ne’e koleta hosi Diresaun Gráfika UNTL nian ne’ebé kobre mai hosi estudante sira bainhira ba halo  jilit monografia  ba selu direita.

Nia dehan, osan ho montante $8,388.00 nia parte  mesak uza $7,000-resin no  iha $1,000 hanesan ne’e mak kargu xefia balun iha diresaun gráfika mós halo empréstimu.

“Ha’u sei esforsu ba oin sei devolve fila-fali osan sira ne’ebé  uza hotu ona,” arguidu HW hateten perante iha sala audiénsia iha TDD.

Prokuradór Rogeiro Viegas  hato’o rekerimentu ba Tribunál  atu halo alterasaun medida koasaun Termu Identidade Rezidénsia (TIR ) ne’ebé antes ne’e aplika ba arguidu  atu aplika fila-fali aprezentasaun periódiku kada semana dala ida iha Ministériu Públiku  tanba arguidu nu’udar sidadaun indonézia  ne’ebé daudaun  vistu  mate  hahú 2012 to’o mai agora no mós pasaporte   mate iha 2018 to’o agora nune’e prezensa arguidu nian agora iha Timor-Leste kauza ilegálmente.

Tribunál koletivu aseita ho pedidu MP nian  no  haree ba iha moldura penál hosi krime ne’ebé imputa ba arguidu tinan tolu to’o tinan-10  kadeia, ho medida koasaun alterasaun ne’e hahú  iha  segunda 01 fevereiru 2021 ,arguidu sei aprezenta an iha MP kada semana dala ida hodi asegura prosesu julgamentu ne’e to’o tránzitu julgadu ho di’ak liu-tan.

Hafoin rona tiha parte sira, Tribunál deside adia fila-fali julgamentu ne’e ba iha loron  05 fevereiru, tinan ne’e, iha tuku 17:00 otl, hodi rona sasin sira seluk.

 Audiénsia julgamentu ne’e prezide hosi juis Evangelinho Belo, Ana Paula Fonseca, José Gonçalves no Ministériu Públiku reprezenta hosi prokuradór Rogeiro Viegas no arguidu hetan asisténsia legál hosi defensór públiku Juvinal Y. Freitas.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here