Logotipu TDD. Imajen Tatoli/Dok.

DILI, 19 janeiru 2021 (TATOLI)-Tribunál Distritál Dili (TDD), ohin, liuhosi julgamentu kontinuasaun ba kazu Universidade Nasionál Timor Lorosa’e (UNTL) rona  auditór hosi Tribunál Kámara Konta  nu’udar testemuña peritu.

Prosesu kazu ne’e Ministériu Públiku (MP) notifika arguidu na’in-42  ne’ebé envolve mós atuál reitór UNTL, eis reitór balun ho  kargu xefia no funsionáriu administrasaun balun.

Tuir  akuzasaun MP nian ho prosesu númeru 0093/116.PGGCC, katak tuir termu artigu 236 hosi kódigu prosesu penal dedús akuzasaun no rekere julgamentu ba prosesu komún ba tribunál koletiva kontra arguidu sira.

Hanesan arguidu sira inisiál, ASCG, LSA, JFS, MF, UDG, LDC, BACR, JHSB, FMM, no nia maluk sira seluk ne’ebé servisu iha administrasaun gabinete UNTL, inklui mós reitór atuál rasik ne’ebé uluk assume kargu hanesan vise reitór UNTL.

Arguidu sira mak hanesan SCJ , LSA, JFS, MF, LDC akuza ho prosesu Nuc.0171/14.PDDIL, hanesan responsavel ba konta bankária la’ós ofisial iha UNTL.

Iha loron 21 jullu 2002, BACR husu pesoalmente ba BNU atu loke konta bankária la’ós ofisial UNTL, iha 138002010001/2, no hatudu responsavel konta ba nia an rasik no LSA.

Iha loron 27 jullu 2003, Governu la’ós autoridade bankária no pagamentu hosi Timor-Leste husu ba BNU, kaixa Jerál Depózitu, loke konta ofisial atu bele depozita reseita sira husi edukasaun hanesan no konta bankária 190013410001.

Mezmu hanesan ne’e, iha loron 01 juñu  2007, BACR  kontinua ho konta bankária la’ós ofisial no husu nafatin konta bankária la’ós ofisial ba BNU atu bele loke konta bankária la’ós ofisial ne’e ho númeru konta 40882600001 no temi responsavel nia naran rasik, FH no LSA.

Arguidu  mezmu hatene ona iha konta ofisial, maibé kontinua depozita reseita sira ne’ebé mai husi estudante sira ba iha konta bankária la’ós ofisial ne’e.

Kuandu arguidu  AGC sai hanesan Reitór iha UNTL, hahú hosi 11 janeiru 2011, nia kontinua uza konta bankária la’ós ofisial ne’e, mezmu nia mós hatene ona iha konta ofisial.

Iha loron 10 novembru 2011, arguidu AGC no LSA husu nafatin ba BNU para taka konta bankária la’ós ofisial  iha erru no konta 1380020.10002 no husu transferénsia ho montante osan  $34,862.59 erru ba konta bankária  1380020.10001 ne’ebé mós la’ós ofisial.

Iha loron 03 juñu 2011, AGC no LSA  husu ba ANZ para atu taka tiha númeru konta bankária 10.1161.687.030, 10.1161. 687.001, 10.111.1981.030, konta bankária la’ós ofisial no husu transferénsia ho montante osan ne’ebé hetan iha konta bankária sira iha leten ba konta bankária la’ós ofisial ho númeru konta 1380020.10001.

Aktu hosi responsavel BACR , AGC,  LLSA, ba konta bankária hosi UNTL hodi depozita reseita publika sira, no balun depozita ba reseita proveniente hosi projetu kooperasaun bilateral sira, sem prevee hosi Ministériu Finansa, iha violasaun flagrante hosi númeru  2 no 3 artigu 13, iha 1 no 4 husi artigu 15, tanba viola termu legál ka regulamentu ne’ebé relasiona ho jestaun no kontrolu orsamentál, tezoureira no patrimóniu.

Abertura hosi konta bankária refere “Laos ofisial” ba depózitu reseita públika sira sem hetan autorizasaun husi MF no mezmu arguidu AGC, LSA no FA hatene katak iha konta bankária ofisial, mezmu hanesan ne’e kontinua husu nafatin.

Hanesan hetan iha relatóriu auditoria hosi kámara konta deteta katak iha 2011 (montante konta nafatin ho 2010) UNTL hala’o kobransa hanesan: propina hosi Lisensiatura no  baxarelatu (S1 no D3) $373,220, selu taxa no multa hosi alunu sira  hamutuk $134,029,  Kooperasaun bilaterál no transferénsia ba Tezouru $471,184,  reseita sira seluk  hamutuk $38,137, total: $1,016.57.

Mai fali Iha tinan  2012: propina hosi lisensiatura no  baxarelatu (S1 no D3) $447,228 taxa sira seluk husi mestradu no doutoramentu (S2 no S3) $170,320,  Kontribuisaun ba edifísiu $106,319,     selu taxa no multa hosi alunu sira $094,849, Kooperasaun bilaterál no transferénsia ba Tezouru $432,681, ba Gráfika      $2.800, INL $13,708, reseita sira seluk $238,225, Total:  $1,497.130.

Aléinde faktu sira ne’ebé hatudu, iha mós orsamentu sira seluk, ne’ebé ligadu ho prosesu rejistu ho númeru 0171/14.PDDIL ne’ebé nia kauza prejuizu ba estadu RDTL ne’ebé afeta ba pagamentu oras estraordináriu nia insentivu ho totál global $30,226.00.

Arguidu sira MP akuza  ho krime pekulatu ne’ebé previstu iha artigu 295, pekulatu  uzu iha artigu 296, falsifikasaun dokumentu anotasaun téknika iha artigu  303 no mós administrasaun da noza iha artigu 274  hotu-hotu iha kódigu penál Timor-Leste.

Liu hosi audiénsia julgamentu ne’e, sasin hosi Tribunál Kámara Konta ho inisiál AD fó sasin ba TDD katak, auditória ne’ebé sira-nia parte hala’o iha  2011-2012 iha UNTL hodi haree ba reseita naun fiskál ne’ebé UNTL rekolla hosi propina estudante, multa, ajudu externa.

Nia konfirma, UNTL kria konta ofisiál ida (1) iha banku BNU no konta la ofisiál neen (6); tolu (3) iha BNU no tolu (3) iha banku ANZ maibé tuir lei atu loke konta ba entidade Estadu nian hotu tenke autoriza hosi Ministériu Finansa ka delegasaun kompeténsia hosi membru Governu  tutela ba MF, maibé hafoin  auditor sira halo apuramentu  analiza prosesu ne’e la kumpre  hodi viola prinsípiu  lei.

Nia haktuir, tuir rezultadu auditoria reseita naun fiskál UNTL iha 2011-2012  iha millaun $2-resin no  osan sira ho montante iha 2011 iha $649.248 ho 2012 iha $466,356 mak tau iha konta ofisiál restu tau iha konta la ofisiál.

“Osan sira ne’ebé tau iha konta la’ós ofisiál ne’e hodi gasta ba despeza  halo pagamentu estraordináriu, halo festa natal, atividade diseminasaun lei, semináriu ho sira seluk,” sasin AD hateten.

Hafoin rona  tiha deklarasaun Tribunál deside adia fila-fali julgamentu ne’e ba iha loron seluk hodi rona sasin balun.

Audiénsia julgamentu ne’e prezide hosi Juis Joao Ribeiro, Julmira Auxliadora, Argentino Nunes,  Ministériu Públiku reprezenta prokuradora, Lidia Soares no arguidu sira hetan asisténsia legál hosi  Defensor Públiku Eustáquio Guterres, advogadu privadu José Guterres ho advogadu na’in ida seluk.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here