Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (29/01), Imajen TATOLI/Egas Cristovão

DILI, 29 janeiru 2021 (TATOLI)Governu liuhosi reuniaun Konsellu Ministru (KM) aprova projetu Dekretu Governu, ne’ebé aprezenta husi Primeiru-Ministru (PM), Taur Matan Ruak, kona-ba medida ezekusaun Estadu Emerjénsia (EE), ne’ebé renova ona husi Dekretu Prezidente Repúblika numeru 6/2021 fulan-janeiru, hodi hatán ba pandemia COVID-19.

EE faze da-sanulu ba loron-30, abranje territóriu nasionál tomak no vigora iha tuku 00:00 loron 02 fevereiru  2021 to’o tuku 23:59 loron 03 marsu 2021.

Ministru Prezidénsia Konsellu Ministru, Fidelis Manuel Leite Magalhães, hateten medida ezekusaun ne’e kuaze hanesan ho EE da-siak, maibé iha mudansa oituan de’it.

“Medida ezekusaun agora halo forte liután iha parte balun, mak halakon auto-kuarentena iha uma (kuarentema domisiliáriu),” Ministru Fidelis relata hafoin ramata reuniaun ezekutivu iha Palásiu Governu, sesta ne’e.

Notísia relevante: Prezidente Repúblika dekreta EE da-sanulu

Nune’e, bainhira medida ne’e vigora, ema mai husi rai-liur iha opsaun balun maka Estadu sei prepara, seluk mak ba fatin ne’ebé indika ona.

“Individu sira bele ba hela durante loron-14 no parte saúde sei impoen regra, maibé regra ida-ne’e iha esesaun ba diploma sira tanba iha konvensaun viena taka dalan atu limite liberdade diplomata sira-nia,” nia akresenta.

Hanesan ne’ebé hateten iha Dekretu Prezidente Repúblika, katak iha termu globál situasaun epidemiolójika hatudu tendénsia agravamentu, liuliu evolusaun pandémika iha provínsia Indonézia Timór Osidentál (NTT-Nusa Tenggara Timur), tanba ne’e impoin manutensaun konjuntu kona-ba medida prevene importasaun COVID-19 ba territóriu nasionál no ninia transmisaun lokál entre populasaun.

Dekretu Governu impoin katak ema hotu ne’ebé iha territóriu nasionál tenke adota no promove adosaun komportamentu distansiamentu sosiál, hanesan la partisipa iha fatin halibur ema barak, mantein distansiamentu pelumenus metru ida husi ema seluk, utiliza máskara fasiál ne’ebé taka inus no ibun bainhira tama iha fatin públiku.

Nune’e mós, fase liman beibeik, liuliu iha kontaktu ho sasán sira hanesan osan no bainhira hakarak tama iha estabelesimentu komersiál sira ka iha edifísiu sira ne’ebé funsiona servisu administrasaun públika.

Aleinde ne’e, iha EE períodu ne’e, sei nafatin bandu hakat liu fronteira terrestre ba fins tradisionál ka kostumeiru sira no mós ba asesu merkadu sira ne’ebé regula ona tanba sei mantein nafatin sansaun sira.

“Ema estranjeiru sira ne’ebé tama iha territóriu nasionál, liuhosi fronteira terrestre sira, nafatin sujeita ba autorizasaun prévia,” Ministru hatutan.

Durante períodu vijénsia EE, lisensa hotu, autorizasaun no aktu administrativu sira seluk inklui dokumentu sira mantein válidu la haree ba ninia validade prazu.

Iha medida ne’e, mensiona atu ajente servisu seguransa tenke sensibiliza ema hotu atubele kumpre saida maka hatuur iha Dekretu Governu iha ámbitu EE.

“Ajente forsa seguransa bainhira identifika ema la kumpre orden ne’ebé fó sai ona, bele hato’o keixa ba Ministériu Públiku kona-ba saida maka akontese, no ema sira-ne’ebé viola sei asume responsabilidade kriminál tuir regra ne’ebé prevee iha Kódigu Penál,” Portavós Governu subliña.

Iha kazu infrasaun ne’ebé komete husi sidadaun estranjeiru, Servisu Migrasaun mak sei haree.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here