Prezidente Repúblika, Francisco Guterres Lú Olo. Imajen TATOLI/António Gonçalves.

DILI, 28 janeiru 2021 (TATOLI)–Prezidente Repúblika Francisco Guterres ‘Lú Olo’ dekreta ona Estadu Emerjénsia (EE) da-sanulu.

Notísia Relevante: PN autoriza Prezidente Repúblika dekreta EE ba loron 30 tán

“Prezidente Repúblika, Francisco Guterres Lú Olo, iha 27 janeiru 2021, dekreta Estadu Emerjénsia da-sanulu ba loron 30, hahú hosi tuku 00.00 iha 02 fevereiru 2021 (tersa- feira) no termina iha tuku 23.59 iha 03 marsu 2021 (kuarta- feira),” komunikadu imprensa hosi Palásiu Prezidensiál ne’e haktuir ne’ebé Agência TATOLI asesu, kinta ne’e.

Iha komunikadu imprensa ne’e hateten, estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika.

Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál iha loron kuarta (27 janeiru) ne’e.

Molok haruka pedidu ba PN, Xefe Estadu mós rona opiniaun hosi Konsellu Superior Defeza no Seguransa no Konsellu Estadu.

Pedidu Governu ba estensaun estadu emerjénsia tanba haree ba evolusaun preokupante ba situasaun epidemiolójika no proliferasaun kazu rejistadu ho SARS-CoV-2 ne’ebé aumenta iha nível rejionál no nível mundiál.

Iha nível mundiál, tuir Organizasaun Mundiál Saúde, iha 26 janeiru 2021 rejista kazu konfirmadu liu 100.250,000 (milaun atus ida rihun rua nulu resin lima-nulu) no liu 2. 100, 000 (milaun rua rihun atus ida) mak mate.

“Ia-nia viziñu no belun, rejista kazu konfirmadu liu millaun ida ho infesaun husi SARS-CoV-2 no liu 28.000 mak mate tanba COVID-19. Iha Provínsia Nusa Tenggara Timur kazu infesaun konfirmadu 4,350 no hamate ona ema na’in-122. 

Deklarasaun estadu emerjénsia ne’e sei abranje territóriu nasionál tomak.

Estadu emerjénsia sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualkér pontu iha territóriu nasionál, direitu reuniaun no manifestasaun, liberdade ba kultu, no direitu propriedade no inisiativa ekonómika privada.

Autoridade públika kompetente sei impoin restrisaun nesesária ba redusaun risku hada’et nian no ezekuta medida prevensaun no kombate pandemia, hanesan distansiamentu sosiál, kuarentena ba suspeitu infesaun, izolamente ba moras no suspeitu, konfinamentu domisiliáriu, uzu obrigatóriu máskara, fase-liman no distánsia fízika.

Desde fulan marsu, hafoin rejista kazu konfirmadu ida ho SARS CoV-2, Timor-Leste implementa kedas estadu emerjénsia atu fó kbiit ba Governu hodi foti medida prevensaun no kontrolu hodi hasees sidadaun hotu-hotu hosi kalamidade públika ne’ebé bele mosu hosi moras COVID-19.

Tuir dadus, ohin loron, Timor-Leste rejista kazu pozitivu hamutuk na’in-18 no hosi marsu 2020 to’o ohin loron, kazu konfirmadu ho SARS-CoV-2 hamutuk na’in 68, rekuperadu na’in-50 no laiha ema ida mak mate.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here