Logotipu MEJD

DILI, 28 janeiru 2021 (TATOLI)—Ministériu Edukasaun Juventude no Desportu (MEJD), liu hosi Diresaun Nasionál Ensinu Rekorrente (DNER), planeia atu elabora tan kurríkulu Ensinu Sekundáriu iha diresaun ne’e, tanba oras ne’e daudaun iha de’it mak ensinu báziku primeiru, segundu no teriseiru síklu.

Diretór nasionál DNER, José Artúr Viana hateten, planu elaborasaun ne’e tanba diresaun ne’e nia haree katak, iha Timoroan barak ne’ebé abandona ensinu sekundáriu, nune’e ho integrasaun iha kurríkulu ne’e sei fasilita hodi bele hetan diploma ensinu sekundáriu no bele asesu ba ensinu superiór.

Notísia Relevante: 2016-2020 Ensinu Rekorrente atribui diploma bázika ba estudante 816

“Foin lalais ita nia estudante abandonadu lubuk ida husi nível ensinu báziku, terseiru síklu inklui membru PNTL no F-FDTL balun, hakarak mai tuir ezame ekivalénsia iha ensinu rekorrente hodi hetan diploma ensinu sekundáriu, nune’e bele tama ba universidade no mós atu hetan formasaun diviza,” José Artúr Viana hateten ba jornalista Agência Tatoli iha nia serbisu fatin Vila Verde, kinta (28/01).

Tanba DNER laiha ezame ekivalénsia, entaun seidauk bele simu Timoroan hirak ne’e, nune’e diresaun iha ona planu atu elabora kurríkulu ba ida ne’e.

“DNER foin mak iha de’it eskola ekivalénsia ba estudante abandonadu ensinu báziku segundu no terseiru síklu. Tanba ne’e, DNER labele fasilita estudante abandonadu atu hetan diploma ensinu sekundáriu,” nia subliña.

Nia hatutan, elaborasaun kurríkulu ba ensinu sekundáriu tenki halo duni atu iha futuru bele ajuda estudante sira asesu ba unversidade.

Atu elabora kurríkulu ne’e, nia hateten, tenki hetan apoiu tékniku no matenek hosi espesialista  sira, maibé DNER hasoru difikuldade ho orsamentu.

“Ne’e duni, bainhira iha tinan ne’e mak la konsege elabora, sei  tau ba 2022,” nia dehan.

Desde estabelesimentu Diresaun Nasionál Ensinu Rekorrente (DNER), hosi Ministériu Edukasaun Juventude no Desportu (MEJD) iha tinan 2016 to’o 2020, konsege gradua estudante na’in 816 ho diploma bázika.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here