Koordenadór pilár hitu COVID-19, Nilton da Silva. Imajen/Felicidade Ximenes.

DILI, 27 janeiru 2021 (TATOLI)—Ministériu Saúde (MS), rejista tan Timoroan ida pozitivu COVID-19, ne’ebé izola ona hodi halo tratamentu iha sentru izolamentu Vera Cruz.

“Ohin 27 janeiru 2021, Ministériu Saúde rejista tan Timoroan na’in ida ne’ebé konfirmadu kazu COVID-19, pasiente mane ho idade 27 ne’e iha síntoma hanesan isin kolen no tolan kaben moras,” Koordenadór pilár VII COVID-19, Nilton do Carmo da Silva,  atualiza kazu ne’e liuhosi konferénsia imprensa, iha salaun MS Caicoli, kuarta (27/01).

Médiku ne’e konta tuir kronolojia katak, iha 24 janeiru pasiente ne’e informa ba médiku iha fatin kuarentena katak, iha síntoma, ho ida-ne’e ekipa vizilánsia responde kedan hodi halo teste swab ka foti amosta.

“Rezultadu teste hosi laboratóriu relata katak, sidadaun ne’e pozitivu COVID-19. Ho nune’e, ekipa jestaun kazu iha pilár hitu evakua kedan pasiente refere ba iha izolamentu Vera Cruz,” Nilton subliña.

Nia hatutan, Timoroan ne’e mai hosi Indonézia hamutuk ho pasiente pozitivu hirak ne’ebé oras ne’e daudaun iha izolamentu Vera Cruz.

Sidadaun sira ne’e tama mai Timor-Leste liuhosi Pontu Entrada Batugade iha loron kuarta 20 janeiru no iha Dili hela iha kuarentena otél Novo Horizonte.

“Atu informa mós ba públiku katak, pasiente COVID-19 iha izolamentu Vera Cruz enjerál sira-nia kondisaun di’ak hotu, inklui ida-ne’ebé ho idade 64,” nia salienta.

Entretantu, dadus 27 janeiru 2021, komulativu kazu 68, kazu foun 1, no atuál baixa 18.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here