Imajen/Media PR.

DILI, 26 janeiru 2021 (TATOLI)–Parlamentu Nasionál (PN), ohin, aprova ona iha faze jeneralidade kona-ba proposta-lei rejime jurídiku ba arbitrajen voluntáriu hodi halo alterasaun ba artigu balun iha Kódigu Prosesu Sivíl (CPC-sigla portugés).

Proposta-rezolusaun ne’e ho nº11/V (2ª) ne’e aprovada ho rezultadu votasaun a-favór 57 no abstensaun 2.

Notísia Relevante: Ohin, PN diskute proposta-lei ida no proposta-rezolusaun ida

“Ho no nune’e proposta-lei rejime jurídiku ba arbitrajen voluntáriu hodi halo alterasaun ba artigu balun iha Kódigu Prosesu Sivíl aprovadu iha faze jeneralidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál.

Prezidente Komisaun A (Justisa no Konstitusionál), Deputadu Joaquim dos Santos “Boraluli) fundamenta iha relatóriu no paresér atu altera artigu balun iha CPC atu Timor-Leste harii rejime rasik, nune’e Governu husu ba parlamentu atu aprova rejime jurídiku ne’e.

“Ne’e signifika bainhira iha disputa ruma, liuliu disputa komersiál. Bainhira ema sira-ne’ebé halo disputa ne’e iha marjen atu hili sira-nia árbitru rasik, arbitru ne’e sira hili hosi juiz sira hosi rai-laran ka bele mos juiz sira hosu rai-li’ur maibé ita tenke harii sentru ba arbitrajen, hodi fó solusaun ba sira-nia problema,” Deputadu Joaquim dos Santos, esplika ba Agência TATOLI.

Nia hatutan, bainhira parte rua ne’ebé envolve iha disputa la konkorda, bele rekorre ba tribunál judisiáriu hodi halo anulasaun. Nia dehan, proposta-rezolusaun konkluzaun mak parte rua iha kazu disputa ruma eskolla sé mak bele tesi-lia.

“Disputa ne’e la’os rai-laran de’it maibé bele mós rai-li’ur hanesan kompañia rai-liur ho rai laran, kompañia rai laran ka rai-li’ur ho estadu. Rejime atu kria kondisaun rezolve problema disputa sira,” nia dehan. 

Nia hatutan, durante ne’e Timor-Leste la konsege rezolve disputa komersiál sira tanba laiha instrumentu sentru arbitrajen voluntária ne’e.

Nia fó ezemplu, bainhira arbitru sira iha estranjeiru mak rezolve maibé parte ida la konkorda bele rekore ba tribunál Timor nian hodi halo anulasaun.

Iha proposta-lei ne’e husu atu halo alterasaun ba artigu 841, artigu 679 númeru 2 no halo redasaun foun ba artigu 67. Ho alterasaun artigu balun iha CPC sei armoniza diploma foun kona-ba arbitrajen.

Entretantu, Prezidente PN husu ba Komisaun A atu kontinua debate iha espesialidade kada artigu.

Proposta-lei ne’e aprezenta hosi Ministru Prezidente Konsellu Ministru, Fidelis Magalhães iha momentu asume Ministru Reforma Lejizlativa no Asuntu Parlamentár no Ministru Justisa Manuel Cárceres da Costa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here