Konferénsia imprensa LFTL. Imajen Tatoli/Dok

DILI, 26 janeiru 2021 (TATOLI) – Liga Futeból Timor-Leste (LFTL) estuda hela atu foti desizaun ba alternativa rua iha lala’ok liga nian hodi envolve adeptu sira ho limitasaun ka la envolve adeptu sira hodi asiste de’it iha kanál live streaming TVE iha ámbitu estadu emerjénsia no pandemia COVID-19.

“Ita hein de’it saida Ministériu Saúde no Estadu deside estadu emerjénsia ne’e to’o bainhira. Liga mós iha ona planu atu manda karta ida ba Ministériu Saúde hodi konfirma asuntu ne’e,”  diretór verifikasaun LFTL,  José Carvalho, informa hodi responde Agéncia TATOLI liuhosi mensajen WhatsApp, tersa ne’e.

Boavista la aseita

Hosi sorin seluk, jerente Boavista FC Timor, Ezzy Leong, deklara sira-nia parte la aseita ho jogu ida laiha adeptu no  bainhira jogu ne’e laiha duni adeptu mak Boavista sei la partisipa.

“Jogu ida mai laiha adeptu hanoin la dun di’ak, hanesan maun Boot Xanana ko’alia ona “sem adeptos não  é futeból”. Ida ne’e mak ami nia pozisaun jogu ida mak laiha adeptu, ami Boavista sei la partisipa,” Ezzy Leong, lia-tun  ba Jornalista sira iha edifísiu Boavista FC Timor iha Bairro Central, Dili.

Nia dehan, Timor-Leste labele adapta hosi liga sira iha Europa no seluk tan ne’ebé jogu laiha adeptu sira. tanba klube barak hakarak investe barak tanba adeptu sira.

“Patrosinadór sira apoiu ami mós hakarak promove sira nia produtu sira ba ema hodi haree, ema sira ne’e mak adeptu sira, ne’ebé ami hanoin jogu laiha adeptu sira ne’e la’ós futeból,” nia afirma tan.

Jornalista       : Hortencio Sanchez

Editór             : Francisco Simões

 

HAKEREK NO HATÁN

Please enter your comment!
Please enter your name here