Logotipu MEJD

DILI,27 janeiru 2021 (TATOLI)—Ministériu Edukasaun Juventude no Desportu (MEJD) prevee rihun $200 hosi Orsamentu Jerál Estadu (OJE) 2021, ba Diresaun Nasionál Ensinu Rekorrente (DNER) atu selu saláriu profesór na’in 48, inklui halo reparasaun ba sala-de-aula iha sentru formasaun 10 ne’ebé estabelese ona.

“Tinan ne’e ita hetan orsamentu rihun $200, ki’ik liu kompara ho tinan kotuk, ne’ebé ita hetan rihun $300. Maski orsamentu iha tinan ne’e ki’ik, maibé ita kontinua prevee ba saláriu profesór 48 nian, inklui halo reparasaun sala-de-aula iha sentru formasaun 10 ne’ebé iha,” Diretór nasionál DNER, José Artúr Viana, hateten ba jornalista Agência Tatoli iha serbisu fatin Vila Verde, tersa (27/01).

Notísia Relevante:2016-2020 Ensinu Rekorrente atribui diploma bázika ba estudante 816

Diretór ne’e esplika, profesór na’in 48 ne’ebé iha Governu selu tuir saláriu funsionáriu públiku ho nível ne’ebé la hanesan.

“MEJD rekruta profesór hirak ne’e iha 2017 ho nível 4-5, no sira nia saláriu hosi $204 to’o $271,”nia subliña.

Sentru formasaun sanulu ne’ebé MEJD liu hosi DNER estabelese ona iha munisípiu sia, mak hanesan Lautém, Baucau, Manatutu, Aileu, Bobonaro, Manufahi, Ermera, Dili no Rejiaun Administrativa Espesiál Oe-cusse Ambeno (RAEOA).

Totál profesór ne’ebé hanorin iha sentru formasaun sanulu ne’e hamutuk na’in 48, no tuir planu DNER sei halo tan rekrutamentu atu reforsa prosesu aprendizazen.

Entretantu, Orsamentu ne’ebé Governu prevee ba Ministériu Edukasaun Juventude no Desportu (MEJD) iha Orsamentu Jerál Estadu (OJE) 2021, hamutuk  $111,478,459.

Orsamentu ne’e, MEJD sei ezekuta ba saláriu vensimentu $61,629,121, bens no serbisu $16,650,131, kapitál menór $2,995,700, kapitál dezenvolvimentu $7,015,951, no transferénsia públika $23,188,556.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here