Komandante Jeral F-FDTL, Major Jeneral Lere Anan Timur.Imajen/Antonio Goncalves

DILI, 27 janeiru 2021 (TATOLI)–Xefe Estadu Maiór Jenerál F-FDTL, Majór Jenerál, Lere Anan Timur orienta ekipa Departamentu Justisa F-FDTL atu loke investigasaun ba kazu tiru komunidade nia karau iha Weto, Suku Dotik, Postu Administrativu Alas, Munisípiu Manufahi.

Orientasaun ne’e bazeia ba Majór Jenerál simu keixa hosi Administradór Munisipiu Manufahi relasiona ho deskonfia membru F-FDTL no PNTL mak tiru mate povu nia karau.

Notísia relevante: Kazu tiru karau iha Dotik, na’in ba karau tenke hato’o keixa  

Keixa ne’e Xefe Estadu Maiór Jenerál simu ofisialmente iha ninia servisu fatin, Komandu Jenerál F-FDTL, Fatuhada, Dili, tersa (26/01).

“Kazu tiru mate karau nian horisehik keixa tama mai ona. Ha’u dirije ona ba Departamentu Justisa atu halo investigasaun,” Lere ba jornalista iha Palásiu Prezidente Nicolau Lobato, Bairru Pité, Dili, kuarta ne’e.

Lere esplika, investigasaun ne’e ekipa sira sei halo ba karau-na’in, Administradór Manufahi no rekolla mós informasaun hosi sasin sira.

Entretantu, antes ne’e, Portavós Polísia Nasionál Timor-Leste (PNTL), Superintendente Xefe, Arnaldo de Araújo tenik, ekipa konjunta Servisu Investigasaun Kriminál Nasionál (SIKN) hamutuk ho Komandu FALINTIL-Forsa Defeza Timor-Leste (F-FDTL) halo ona ezame balístiku ba embolku ne’ebé autór deskoñesidu uza hodi tiru-mate karau.

Nia dehan, ekipa Servisu Informasaun Polísia (SIP), Servisu Nasionál Intelijénsia (SNI) no J2 mós tún ona ba terrenu hodi rekolla informasaun no buka tuir suspeitu sira-nia paradeiru.

To’o notísia ne’e hatún, parte Komandu Jerál PNTL seidauk bele fó-sai rezultadu investigasaun ne’ebé ekipa konjunta hala’o ona.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here