Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 20 janeiru 2021 (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timor husu ba populasaun sira ne’ebé sai vítima ba sira-nia karau deskonfia hetan tiru hosi parte PNTL no F-FDTL, tenke aprezenta keixa ba Komandu PNTL no F-FDTL.

Lere dehan nia rasik to’o agora seidauk simu informasaun ruma hosi nia komandante sira kona-ba kazu tiru komunidade nia karau tolu mate iha área Weto, Suku Dotik, Postu Administrativu Alas, Munisípiu Manufahi.

Notísia relevante: F-FDTL ho PNTL investiga ona kazu tiru karau iha Dotik

“Tiru karau ne’e informasaun de’it. Ha’u seidauk simu keixa ida. Kuandu keixa mai dehan ema tiru duni, sé ha’u-nia ema mak tiru, ha’u sei husu responsabilidade ba nia,” Lere ba jornalista iha Palásiu Prezidente Nicolau Lobato, Bairru Pité, Dili, kuarta ne’e.

Nia hatutan, bainhira vítima sira hato’o keixa ofisiál ba Komandu F-FDTL no PNTL, nia parte sei loke prosesu investigasaun hodi justifika autór sira-ne’e.

Kazu tiru komunidade nia karau akontese iha 14 janeiru 2021, tuku 21:20 otl. Asaun tiru ne’e rezulta komunidade nia karau tolu mate, no karau rua ema konsege tula ba karreta, no karau ida seluk mate husik hela iha fatin akontesimentu.

Iha sábadu, 16 janeiru, parte ekipa Komandu F-FDTL no PNTL koordena kedas ho autoridade lokál sira hodi buka rekolla evidénsia sira iha terenu. Daudaun ne’e, ekipa konjunta sei kontinua halo investigasaun.

Antes ne’e, Reprezentante Komunidade Suku Dotik nu’udar Misionáriu, Irmaun Simon Nono  aprezenta ona keixa ne’e ba parte PNTL no F-FDTL bainhira halo investigasaun ba kazu refere.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here