Diretór Ezekutivu BNCTL, Brígido de Sousa, akompaña husi espoza matebian, Domingas no Xefe suku Maskarinhas, Rui Ilídio, klarifika alegasaun públiku kona-ba atendimentu banku, iha salaun Obrigado Barack, Caicoli, kuarta (27/01). Imajen TATOLI/António Gonçalves

DILI, 27 janeiru 2021 (TATOLI)–Banku Nasionál Komérsiu Timor-Leste (BNCTL, sigla portugés) lamenta ho publikasaun mídia nasionál balun ne’ebé la verifika no konfirma ba dirijente banku molok halo publikasaun, kona-ba alegasaun atendimentu banku ladún di’ak.

Tuir publikasaun, Agostinho dos Reis, monu no mate iha resintu BNCTL Obrigadu Barak, Caicoli, iha loron 18 dezembru 2020 tanba dudu malu bainhira forma atu foti subsídiu idozu ba faze daruak iha tinan 2020.

Diretór Ezekutivu BNCTL, Brígido de Sousa, hateten tanba hetan alegasaun husi públiku no sai virál iha rede sosiál kona-ba atendimentu banku, maka deside forma ekipa halo investigasaun ba kauza no kronolojia mate ne’e inklui rekomenda medida halo atendimentu.

“Ami lamenta no preokupa ho notísia ne’ebé mak publika iha mídia imprime tanba halo públiku, liuliu Govenu no sosiedade sivíl preokupa. Mídia ne’e fó sai informasaun sein halo verifikasaun ho direjente Banku Komérsiu,” Diretór Ezekutivu klarifika liuhosi konferénsia imprensa ne’ebé hala’o iha salaun enkontru Obrigadu Barack, Caicoli, kuarta ne’e.

Ho akontesimentu ne’e, Brígido de Sousa kompromete kontinua hadi’a atendimentu ba kliente BNCTL inklui idozu sira liuhosi introdusaun maneira no mekanizmu atendimentu foun iha tempu badak.

Iha investigasaun, ekipa halo ezersísiu hodi kontaktu no ko’alia ho autoridade lokál suku Maskarinhas, ne’ebé hanesan lokál matebian hela, vizita matebian nia kaben, kontaktu ho ospitál nasionál, verifika no konfirma ho funsionáriu banku inklui seguransa iha resintu banku.

Kronolojia ne’ebé hetan hafoin prosesu investigasaun

Iha loron 18 dezembru 2020 tuku 05:00 dadeer, Agustinho dos Reis (matebian) ho ninia espoza, Domingas, hakat ba BNCTL ho transporte públiku atu foti subsídiu.

Iha resintu banku, sira husu ba seguransa atu tama husi kotuk tanba Agustinho sente moras no seguransa fó atendimentu no autoriza husi kotuk hodi tuur iha fatin hein.

Nune’e, Agustinho ho nia espoza tuur iha kadeira kotuk besik odamatan tama ba fatin atendimentu, maibé iha fatin ne’e derrepente Agustinho sente oin halai no sadere tuun ba kadeira, no seguransa ajuda lori tama kedan hatuur iha laran.

Aleinde ne’e, funsionáriu banku hakbesik hodi atende Agustinho no entrega osan ba nia espoza iha tuku 09:13 dadeer, hafoin seguransa ajuda lori sai bá li’ur no hatuur iha kadeira atu deskansa molok fila bá uma.

Hafoin ida-ne’e, viziñu feto ida hakbesik ba sosa hudi tasak fó ba Agustinho, maibé, haree ba kondisaun saúde ladi’ak, viziñu ne’e bolu karreta tula na’in-rua ba uma iha Maskarinhas.

Klarifikasaun família matebian

Domingas nu’udar espoza husi matebian Agustinho esplika, hafoin to’o iha resintu BNCTL iha dadeer, tuur kedan iha edifísiu kotuk tanba kadeira ema okupa hotu.

“Ami-rua tuur iha baki leten, la kleur nia (matebian) dehan oin halai no deside ami-rua ba tuur iha kotuk, ha’u husu ba seguransa sira katak bele autoriza tama lalais tanba hambrik kleur ladi’ak, matebian ne’e antes hetan asidente (soke husi motór) iha tinan ida liubá, ne’ebé labele tuur kleur. Seguransa sira lori ami no tuur la kleur oin halai ona, entaun seguransa sira kous de’it ona nia no funsionáriu sira fó osan no ami fila,” Domingas haktuir.

Espoza matebian konfirma, to’o uma Agustinho sente moras, nune’e deside lori ba Hospital Nacional Guido Valadares (HNGV) iha loron hanesan tuku 15:00 lorokraik tanba haree kondisaun saúde tuun ba bebeik, hafoin baixa to’o loron 22 dezembru (loron-haat), labele salva no ikus mai hakotu iis.

Xefe suku Maskarinhas, Rui Ilídio. Imajen TATOLI/António Gonçalves

Iha sorin seluk, Xefe suku Maskarinhas, Rui Ilídio, rekoñese katak, informasaun ne’ebé momentu ne’ebá espalla ne’e la loos.

“Deklarasaun ne’ebé ha’u fó sai momentu ne’ebá, la liu husi investigasaun, maibé ha’u hasai ho emosionál, ho deklarasaun sira la loos ne’e fó hanoin fali ba ha’u katak karik atu hasai deklarasaun tenke kuidadu no verifika uluk, tanba ne’e maka ha’u husu diskulpa”, Xefe suku klarifika.

Ikus mai, espoza matebian no Xefe suku konfirma, Agostinho mate la’ós tanba sena malu atu simu subsídiu iha BNCTL, maibé mate tanba moras kleur ona.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here