Komisáriu Jerál Autoridade Expo Dubai Timor-Leste 2020-2021, Manuel Vong, Imajen Tatoli/Egas Cristovão.

DILI, 26 janeiru 2021 (TATOLI)–Komisáriu Jerál Autoridade Expo Dubai Timor-Leste 2020-2021, Manuel Vong, hateten Espozisaun Dubai Mundiál sei fó oportunidade ba Timor-Leste atu dada investidór estranjeiru sira mai iha Timor-Leste atu dezenvolve setór turizmu, petróleu, minerál, servisu, transporte, lojistika, inovasaun, teknolojia no saúde.

Notísia Relevante: Governu sei haruka lista produtu definitiva ba KO Expo Dubai

“Expo Dubai haruka ajenda prinsipál lubuk ida liuliu iha área 10, ita konsidera hanesan oportunidade ba Timor-Leste atu bele partisipa iha eventu boot ida-ne’e,” Manuel Vong hateten ba Agência TATOLI iha nia knaar fatin, Sentru Konvensaun Dili (CCD, sigla portugés), Merkadu Lama, Dili, segunda ne’e.

Manuel Vong konsidera, área 10 ne’e hanesan keep of performance ba kualker nasaun ida atu bele partisipa iha eventu mundiál ne’e. Entre área 10 ne’e, nia dehan, Timor-Leste sei toma atensaun ba setór estratéjiku mak hanesan turizmu, agrikultura, petróleu, transporte no lojistika.

“Ita hotu hatene katak iha Expo Dubai Mundiál ne’e rasik iha tema prinsipál mak “Tau Neon Hamutuk Hodi Harii Futuru”, ho ninia sub-tema tolu mak hanesan Sustentabilidade, Oportunidade no Mobilidade,” nia esplika.

Nia haktuir, hosi sub-tema tolu ne’e rasik Timor-Leste hili mak “Oportunidade” ho objetivu ida katak iha eventu Mundiál ne’e sei partisipa hosi nasaun hamutuk 192.

“Ha’u hanoin iha Expo Dubai Mundiál ne’e rasik previstu tiha ona vizitante hamutuk millaun $25 durante fulan neen (6) nia laran (Outubro 2021-Marsu 2022),” nia dehan.

Manuel Vong hateten, relasiona ho oportunidade ida-ne’e, Timor-Leste rasik define ninia objetivu tolu mak Expo Dubai Mundiál hanesan meiu ida ba Timor-Leste liuliu iha merkadu espesifiku atu dada investedór sira mai Timor-Leste inklui mós dada turista mai rai laran.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here