Plenária Parlamento Nasionál. Imajen TATOLI/Egas Cristovão.

DILI, 26 janeiru 2021 (TATOLI)–Prezidente Repúblika Francisco Guterres ‘Lú Olo’ hato’o ona pedidu ba Parlamentu Nasionál atu autoriza renovasaun Estadu Emerjénsia ba da-sanulu.

Prezidente Parlamentu Nasionál, Deputadu Aniceto Longuinhos Guterres Lopes, simu ona pedidu estensaun hosi Xefe Estadu.

Notísia Relevante: PN aprova estensaun Estadu Emerjénsia ba-dasiak

“Iha ona konvokatóriu atu plenária estraordináriu ba renovasaun Estadu Emerjénsia iha aban (kuarta, 27 janeiru) tuku 15.00 lorokraik,” Deputadu Aniceto Guterres anunsia liuhosi plenária, tersa ne’e.

Entretantu, rezultadu reuniaun Konsellu Superiór Defeza no Seguransa (CSDS-sigla portugés) no Konsellu Estadu (CE-sigla portugés) apoia Prezidente Repúblika Francisco Guterres ‘Lú Olo’ dekreta estensaun Estadu Emerjénsia (EE) bainhira Parlamentu Nasionál autoriza ba da-sanulu tanba nesesária ba Timor-Leste.

“Tanba agora situsaun iha Nusa Tenggara Timor (NTT) grave tebes ona. Hanesan Primeiru-Ministru dehan, agora nia preokupadu loos entaun sira hotu-hotu entende katak Estadu Emerjénsia ne’e nesesariu. Ne’e mak ohin sira analiza iha reuniaun ida-ne’e,” Asesor Prinsipál Prezidénsia Repúblika, Gregorio de Sousa, informa ba jornalista sira iha Palásiu Prezidensiál Nicolau Lobato, Bairru-Pité, Dili, tersa ne’e.

Asesór Prinsipál Prezidénsia Repúblika, Gregorio de Sousa, hateten reuniaun loron ohin nian ko’alia kona-ba iha semana kotuk prezidente simu pedidu ida hosi Governu atu renova Estadu Emerjénsia ba da-sanulu.

“Ami sei haruka ba Prezidente Repúblika no sei haruka nia pedidu ba Parlamentu Nasionál, Parlamentu Nasionál ohin kedas halo sira-nia konferénsia líder bankada para ajenda ba aban lorokraik debate ba renovasaun estadu emerjensia,” nia hateten. 

Asesor ne’e informa, Xefe Estadu sei haruka pedidu ba Parlamentu Nasionál hodi halo ajendamentu.

“Medida ba implementasaun estadu emerjénsia ne’e Estadu mak sei deside hafoin parlamentu aprova tiha estadu emerjénsia, Governu sei halo dekretu ida, implementasaun sei halo nafatin hanesan estadu emerjensia ida agora ne’e. Aumenta restrisaun ne’e kompeténsia Governu nian,” Asesór Prinsipál PR ne’e esplika.

Notísia Relevante: Prezidente Repúblika deklara estensaun EE ba-dasiak

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here