Prezidente Repúblika, Francisco Guterres Lú Olo. Imajen António Gonçalves

DILI, 30 dezembru 2020 (TATOLI)—Prezidente Repúblika, Francisco Guterres Lú Olo, liu hosi dekretu prezidensial nú 73/2020, dekreta estensaun Estadu Emerjénsia (EE) ba dasiak (9) ne’ebé hahú vigora hosi tuku 00.00 OTL, 03 janeiru to’o 23h59otl loron-01 fevereiru 2021.

Notisia Relevante: PN aprova estensaun Estadu Emerjénsia ba-dasiak

Deklarasaun estadu emerjénsia iha teritóriu laran tomak ne’e, Xefe Estadu halo bazeia ba proposta hosi Governu ne’ebé konsidera aumentu númeru kazu konfirmadu Covid-19, hamutuk 13, iha semana ikus fulan ne’e, hanesan kalamidade públika, situasaun sanitária iha Indonézia no dezenvolvimentu tipu foun SARS-CoV-2 iha nasaun seluk, inklui iha nasaun viziñu Australia no Singapura.

“Nune’e, nesesáriu tebes hala’o nafatin lala’ok prevensaun tuir medidas sira ne’ebé Governu estabelese no tuir protókolu saúde, hodi evita propagasaun pandemia ne’e iha rai-laran,” komunikadu ne’ebé ajénsia TATOLI asesu hosi Prezidénsia Republika Nicolau Lobato iha kuarta ne’e haktuir.

Ho estadu emerjénsia ne’e, sei suspende no limita parsialmente  ezersísiu direitu balu, hosi ema ka sidadaun sira hanesan iha sirkulasaun internasionál, direitu hala’o reuniaun ka halibur malu no selu-seluk tan.

Molok dekreta estadu emerjénsia, Prezidente Repúblika rona uluk Konsellu Estadu no Konsellu Superior Defeza no Seguransa (28/12), ne’ebé apoiu nia iha desizaun ida ne’e. Tuir mai, Xefe Estadu husu autorizasaun hosi Parlamentu Nasionál, ne’ebé, ohin (30/12), autoriza Prezidente Repúblika dekreta estadu emerjénsia ba da-9.

To’o tinan ne’e nia rohan (29/12), tuir dadus hosi Ministériu Saúde, total númeru komulativu kazu konfirmadu Covid-19 iha rai-laran hamutuk 44. Kazu sira ne’e hotu konsidera hanesan kazu importadu no to’o oras ne’e, la rejista ema mate tanba Coronavirus iha Timor-Leste.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here