Diretór Sentru Formasaun Jurídika no Judisiáriu, Antonino Gonçalves. Imajen TATOLI/Egas Cristovão

DILI, 25 janeiru 2021 (TATOLI) – Sentru Formasaun Jurídika no Judisiáriu (SFJJ) kontinua fó formasaun komplementár ba autór judisiál kompostu hosi juiz, prokuradór no defensór públiku.

Diretór SFJJ, Antonino Gonçalves, hateten formasaun ne’e bazeia ba pedidu hosi parte sira bainhira iha difikuldade ba interpretasaun prosesu sira ladún domina iha kestaun lei balun SFJJ disponivel atu kontinua fó formasaun nune’e bele aprofunda liután.

Notísia Relevante : SFJJ Kontinua Fó Formasaun Lian Portugés ba Autór Judisiáriu

Nia dehan, durante ne’e prosesu kompleksu liu-liu mak kona-ba kazu sivíl hanesan lei rai, susesaun direitu eransa ba bens, prosesu inventáriu, direitu família tanba ne’e sentru formasaun fó ona formasaun ba matéria hirak ne’e no mós matéria krime ninian iha kódigu penál, kódigu prosesu penál, lingua portugés ho sira seluk.

“Formasaun kontinua ne’e atu juis sira atualiza sira-nia koñesimentu tanba lei foun barak mak sai kada tinan,” Antonino Gonçalves hateten ba Agéncia TATOLI, iha nia kna’ar fatin, Dili, segunda ne’e.

Nia hatutan, daudaun SFJJ fó formasaun lingua portugés ba ofisiál justisa hosi Tribunál Rekursu, Ministériu Públiku, Ministériu Justisa ho partisipante na’in 70-resin.

Kona-ba formasaun komplementár ba juis no defensór públiku, Antonino Gonçalves dehan, sira-nia parte simu ona pedidu no tau ona ajenda ne’ebé sei realiza formasaun ne’e iha loron 12 fevereiru, tinan ne’e, no durasaun formasaun ne’e depende matéria bele to’o semana ida.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here