DILI, 17 fevereiru 2020 (TATOLI)-Sentru Formasaun Jurídika Judisiáriu (SFJJ), tinan ne’e, kontinua fó formasaun lian portugés ba autór sira, kompostu husi prokuradór, ofisiais justisa no juiz sira.
Notísia Relevante : SFJJ Sei Rekruta Formandu Judisiál
Formasaun ne’e ho nia objetivu atu eleva liu tan koñesimentu lian portugés ba autór judisiáriu sira.
Liu husi enkontru Konsellu Jerál SFJJ, ohin, ne’ebé lidera husi Ministru Justisa Manuel Cárceres da Costa, no akompaña mós husi Prezidente Tribunal Rekursu (PTR), Deolindo dos Santos, Prokuradór Jerál Repúblika (PJR), Jose da Costa, aprova ona planu annual ne’e hodi realiza formasaun lian portugés.
Ministru Manuel Cárceres da Costa, hateten, formasaun ne’e hanesan rutina ne’ebé kontinua hala’o iha nivel formasaun báziku no avansadu. Tanba ne’e, SFJJ prepara daudaun ona kalendáriu atu bele halo ona aula iha tempu badak nia laran.
Tuir planu, parseiru UNDP mós sei oferese formasaun kona-ba direitu do mar no Uniaun Europeia sei realiza mós formasaun ba autór judisiáriu sira.
Jornalista : Nelson de Sousa
Editór : Francisco Simões
