Ofisiál PNTL bainhira lori saudozu Sabino Guntur nia isin-mate ba PN hodi halo serimónia fó omenajen ikus nian, segunda (25/01). Imajen Tatoli/Antonio Goncalves.

DILI, 25 janeiru 2021 (TATOLI)–Deputadu David Dias Ximenes “Mandati” rekoñese saudozu Sabino Soares “Guntur” nia kontribuisaun ba prosesu luta ba libertasaun nasionál tanba ajuda dinamiza frente klandestina.

Notísia Relevante: PN aprova votu pezár ba Deputadu Guntur

“Saudozu Guntur hanesan mós joven sira iha Dili ne’ebé loke forum barak atu kontra duni Indonézia ninia prezensa iha Timor. Ita labele nega hosi Dili ba to’o Baucau, ita sempre iha joven sira-ne’ebé salientadu hodi fó sira-nia partisipasaun no dinamiza frente klandestina, apatir hosi Lospalos to’o Jakarta,” Deputadu Bankada FRETILIN, David Dias Ximenes, ko’alia iha plenária bainhira aprova votu pezár hodi presta última omenajen ba saudozu Guntur, segunda ne’e.

Nia haktuir, kontribuisaun saudozu Guntur nian mak hamoris rejiaun I, II, III, IV no rejiaun V tanba organizasaun barak submete ba frente klandestina.

“Organizasaun klandestina sei koñese ‘sé mak sé’ no Sabino Guntur labele sai hosi sirklu frente klandestina nian. Ita momentu ne’ebá, ita konvense joven sira-nia determinasaun tenke ho disiplina. Sira dehan mate mós ami hakarak mate, moris mós ami tenke moris tuir nasionalista Timor-Leste nian,” Deputadu Mandati haktuir.

Deputadu Mandati dehan, juventude rezisténsia inklui Guntur mak alfa no omega ba prosesu luta naruk ne’e.

Entretantu, Deputadu Bankada Partidu Demokrátiku (PD), Mariano Assanami Sabino, hateten iha líder reziténsia barak mak lakohi rejistu ba Komisaun Omenajen.

“Se membru sira la rejistu, ami ne’ebé uluk lidera sira tenke tún ba baze hodi halo rejistu. Komisaun Omenajen ne’e ninia servisu mak identifika kuadru sira-ne’ebé luta ba ita-nia funu tanba luta ida-ne’e laiha patraun ida, ita-nia kontribuisaun hotu ona maibé rekoñesimentu hosi Estadu ne’e,” Deputadu Assanami fó hanoin.

Nia husu ba Komisaun Omenajen labele tuur hein hodi ema mai rejistu maibé tenke buka identifika ema ne’ebé la rejistu sai veteranu tanba sira-nia kontribuisaun boot tebes.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here