Ministru Finansa, Rui Augusto Gomes. Imajen TATOLI/Egas Cristóvão

DILI, 25 janeiru 2021 (TATOLI)Foin lalais iha reuniaun Konsellu Ministru (KM), Ministru Finansa (MF), Rui Augusto Gomes aprezenta opsaun polítika-lejizlativa sira ne’ebé sai hanesan baze rejime jurídiku foun atu simplifika prosesu aprovizionamentu kontratu públiku inklui ninia infrasaun sira.

Rejime jurídiku foun ne’e hakarak rezolve konstranjimentu sira ne’ebé eziste no hadi’a enkuadramentu normativu ba prosedimentu aprovizionamentu.

Notísia relevante: Reuniaun KM: MF aprezenta rejime jurídiku simplifika prosesu aprovizionamentu

Ba kestaun ne’e, Ministériu Finansa (MF) halo hela preparativu sira hodi diskute hamutuk iha KM hafoin haruka ba Parlamentu Nasionál (PN).

“Lei ne’e Parlamentu nian, saida mak Governu halo mak preparativu liuhosi Ministériu Finansa hodi lori ba Konsellu Ministru no hetan aprovasaun. Ami aprezenta konseitu polítika saida maka presiza hadi’a, tanba Lei Aprovizionamentu ne’e antigu ona desde tinan 2005 to’o agora, ne’ebé tinan 15 ona, tanba ne’e presiza troka,” Ministru Rui Gomes relata hafoin sorumutuk semanál ho Primeiru-Ministru, Taur Matan Ruak, iha Palásiu Governu, segunda ne’e.

Entretantu, dekretu-lei númeru 10/2005, 21 novermbru, kona-ba Rejime Jurídiku Aprovizionamentu, kompostu hosi artigu hamutuk 115.

Lei ne’e mai ho objetivu atu estabelese norma jerál realizasaun despeza akizisaun bens no servisu ka ezekusaun obra, ne’ebé destina ba nesesidade entidade administrasaun direta no indireta Estadu.

Nune’e mós, abranje prosedimentu aprovizionamentu servisu públiku ho kustu Orsamentu Jerál Estadu ka hanesan rekursu finanseiru seluk ne’ebé kontroladu ho administrasaun Estadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here