Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, segunda (20/01). Imajen TATOLI/Egas Cristovão

DILI, 20 janeiru 2021 (TATOLI)–Ministru Finansa (MF), Rui Augostu Gomes, aprezenta ba Konsellu Ministru (KM) opsaun polítiku-lejizlativa sira ne’ebé sai hanesan baze ba projetu kona-ba rejime jurídiku foun atu simplifika prosesu aprovizionamentu kontratu públiku inklui ninia infrasaun sira.

Tuir Ministru Prezidénsia Konsellu Ministru, Fidelis Manuel Leite Magalhães, rejime jurídiku foun ne’e hakarak rezolve konstranjimentu sira ne’ebé eziste no hadi’a enkuadramentu normativu ba prosedimentu aprovizionamentu.

“Proposta ne’e ho intensaun atu hadi’a liután lei aprovizionamentu, nune’e bainhira implementa no halo prosesu aprovizionamentu sira, la hamosu konfuzaun no fasil atu komprende, klaru no kontribui ba dezenvolvimentu ekonómiku iha rai-laran,” Ministru Fidelis esplika, hafoin reuniaun ezekutivu, iha Palásiu Governu, kuarta ne’e.

Aleinde ne’e, bele insentiva dezenvolvimentu setór privadu no hafasil liután ba ministériu sira ne’ebé iha natureza espesiál hanesan defeza, seguransa, saúde.

Portavós Governu ne’e dehan, alterasaun ne’e mensiona mós kona-ba akizisaun bens no servisu ba ezekusaun obra sira, ne’ebé hakarak atu atende nesesidade entidade administrasaun direta no indireta Estadu.

“Lei tenke fó fleksibilidade bainhira hala’o serbisu, labele fó impedementu maibé pelu kontráriu lei aprovizionamentu fó dalan hodi responde ba ezijénsia hirak ne’ebé mosu derepente hosi tempu ba tempu,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here