Reuniaun Konsellu Ministru iha Palásiu Governu. Imajen TATOLI/Egas Cristovão

DILI, 11 janeiru 2021 (TATOLI)—Hafoin Governu aprova regra ezekusaun Orsamentu Jerál Estadu (OJE) ba tinan fiskál 2021, ohin loron instituisaun Estadu sira hahú ezekuta.

Regra ne’e publika iha sesta (07/01), hanesan dekretu Governu númeru 1/2021, 8 janeiru, ne’ebé estabelese ezekusaun OJE 2021.

“Diploma ne’e aplika orsamentu ba órgaun no servisu administrasaun sentrál, Rejiaun Administrativa Espesiál Oé-cusse Ambeno (RAEOA) no seguransa sosiál, ne’ebé permite garante kontrolu orsamentu efetivu no rigorozu no iha tempu hanesan bele simplifika prosedimentu ezekusaun orsamentál, kontinuidade mudansa iha tinan 2020, hanesan objetivu atu fasilita ezekusaun OJE 2021 husi órgaun  no servisu setór administrasaun públika,” refere nota ne’ebé Agência TATOLI asesu iha pájina ofisiál ezekutivu, segunda ne’e.

Notísia Relevante: KM aprova dekretu ezekusaun OJE 2021

Antes ne’e, iha loron 05 janeiru 2021, Ministru Finansa, Rui Augostu Gomes, hateten Governu liuhosi Ministériu Finansa (MF) seidauk husu ba Banku Sentrál Timor-Leste (BCTL, sigla portugés) halo levantamentu fundu petrolíferu hodi sustenta mákina Estadu tanba saldo tezouru iha $325-resin, ne’ebé bainhira saldo tun ba millaun $200 maka sei halo pedidu levantamentu.

Ho alterasaun ne’e, daudaun só iha rejime finanseiru rua hanesan Servisu sein Autonomia Finanseira (SSAF) no Órgaun Servisu no Fundu Autónomu (OSFA), ne’ebé antes alterasaun iha rejime tolu.

“RAEOA no Seguransa Sosiál iha rejime finanseru rasik, maibé nafatin manda informasaun kona-ba ezekusaun orsamentál ba Ministériu Finansa,” esplika nota ne’e.

Aleinde ne’e, ezekusaun orsamentál kontempla implementasaun orsamentu bazeia ba programa, ne’ebé ninia alterasaun iha impaktu ba meta ne’ebé estabelese ona iha planu anuál, preparadu husi Unidade Planeamentu, Monotorizasaun no Avaliasaun (UPMA), liuhosi relatóriu dezempeñu trimestrál no sistema ‘Dalan ba Futuru’.

Alterasaun ne’e inklui mós data taka ezersísiu orsamentál, ne’ebé kompromisu hotu sei rejista iha Sistema Informasaun Jestaun Finanseira (SIJF) to’o 17 dezembru 2021.

“Pedidu pagamentu bele aprezenta to’o loron 23 dezembru 2021 no pagamentu bele finaliza to’o loron 31 dezembru 2021,” esplika nota husi ezekutivu.

Nune’e mós, iha flesibilidade ezekusaun orsamentál ho flesibilidade boot husi montante autorizasaun despeza, ho eliminasaun autorizasaun ba konstituisaun fundu, no aprovasaun garantia ezekusaun kualidade no eliminasaun kestaun balun hanesan ajuste diretu, pagamentu adiantadu no alterasaun orsamentál.

Maski nune’e, iha obrigasaun halo relatóriu mensál ezekusaun orsamentál no trimestrál kona-ba dezempeñu programa no subvensaun públika no semestrál, ne’ebé hanesan informasaun kona-ba dívida naun finanseira no patrimóniu.

Ministériu Finansa sei elabora lista órgaun no servisu ein inkumprimentu no públika trimestrál hanesan relatóriu ezekusaun orsamentu no ezekusaun mensál ba setór públiku administrativu.

Iha loron 28 dezembru 2020, Prezidente Repúblika, Francisco Guterres ‘Lú Olo’ promulga OJE 2021 ho montante biliaun $1,895, foti husi reseita fundu minarai  biliaun $1,377 no reseita naun petrolíferu millaun $508.

Husi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu husi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

 Jornalista: Antónia Gusmão

Editora: Julia Chatarina

1 KOMENTÁRIU

  1. Parabens ba 8 Governo constitucional nb liderado hs Maun General TMR ho membros Governo tomak tmb uza ka exekuta ona OJE 2021 hd halo desenvolvimento nasaun RDTL, Timor tenki ba oin, hamutuk implementa H6

HAKEREK NO HATÁN

Please enter your comment!
Please enter your name here