Deputadu Sabino Guntur: Imajen/Espesiál.

DILI, 23 janeiru 2021 (TATOLI)–Membru Parlamentu Nasionál hosi Partidu Libertasaun Populár (PLP), Deputadu Sabino Soares ‘Guntur’, sabádu tuku 04.00 dadeersan hakotu ona iis iha Hospital Nacional Guido Valadares (HNGV). 

 Notísia Relavante: Deputadu ‘Guntur’ hakotu iis tanba diabetes

Vise-Prezidente Parlamentu Nasionál, Deputadu Luis Roberto da Silva, sente triste no lakon bainhira rona informasaun Deputadu Guntur hakotu ona nia peregrinasaun iha mundu ne’e.

“Hanesan maluk deputadu ida órgaun Paralamentu Nasionál hakarak hato’o sentidu kondolénsia ba família no oan-ki’ak sira tanba deputadu Guntur mós dedika ninia-aan ba prosesu libertasaun nasionál maibé ita la espera tanba Maromak nia hakarak oin seluk,” Deputadu Luis Roberto da Silva, informa ba Agência TATOLI liuhosi telefónika, sábadu ne’e. 

Vise-Prezidente PN espera saudozu Sabino Soares Guntur bele hetan naroman rohan laek iha Nai Nia kadunan santu.

“Kona-ba bainhira mak Parlamentu Nasionál halo votu pezár seidauk hatene loos tanba oras ne’e parte protokolu parlamentu nian sei prosesa hela. Ami bankada plataforma entendimentu mós oras ne’e iha hela mortuáriu HNGV,” Deputadu Bankada KHUNTO ne’e hateten.

Nia dehan, oras ne’e protokolu Parlamentu Nasionál sei koordena ho família molok aprova votu pezár hodi presta omenajen ikus ba saudozu Sabino Guntur.

Entretantu, Deputada Bankada Partidu Libertasaun Populár (PLP), Domingas dos Santos, hato’o sentida kondolénsia kle’an ba família enlutada.

“Hanesan kolega sente lakon membru parlamentu ida, lakon mós ami-nia vise membru CPN iha PLP. Ha’u lakon tebes ho belun ne’ebé di’ak tebes iha partidu,” Deputada Domingas hato’o sentida kondolénsia laran susar.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here