Matebian 'Guntur' bainhira halo hela tratamentu iha sala ICU. Imajen/facebook.

DILI, 23 janeiru 2021 ( TATOLI)—Deputadu Sabino Soares ‘Guntur’ hakotu iis iha Hospitál Nasionál Guido Valadares (HNGV) tanba sofre moras diabetes.

Hernánio Agostinho Soares hanesan primu rasik ne’ebé akompaña matebian durante hala’o tratamentu iha HNGV hateten, buat ne’ebé médiku rejista kona-bá Guntur nia moras maka, diabestes.

“Familia esforsu maka’as ba nia atu bele rekopera, maibé la konsegue salva tanba nia moras diabetes, inklui sofre pulmaun bubu. Ida ne’e mak labele salva,” Hernánio Agostinho Soares hateten ba jornalista sira iha mortuáriu, HNGV, sábadu ne’e.

Hernánio hatutan, matebian konsege baixa iha Intensive Care Unit (ICU) hodi halo tratamentu ba moras ne’ebé sofre durante semana ida, maibé ohin hakotu iis.

Situasaun ne’e, nia hatutan, halo família triste tanba lakon ema ida ne’ebé durante ne’e família sira laran metin, maibé labele halo buat ida tanba moras ne’e komplikadu tebes.

“Komplikadu liu tan mak foin lalais ne’e halo amputasi ba nia ain, ida ne’e nia sofre liu tan,” nia hateten.

Família sei entrega ba Governu tanba haree ba matebian nia dedikasaun tomak, durante ne’e serbi estadu konta hosi nia sei moris fó mós kontribuisaun ba  prosesu libertasaun nasionál.

“Tanba ne’e mak ami entrega ba Governu atu bele halo planu ba prosesu funerál no ami família akompaña nafatin atu Governu tau iha fatin ne’ebé mak dignu,” nia deklara.

Família mós iha ona planu atu haloot iha nia moris fatin suku Lelalai, Makaloso Quelicai, maibé família sei halo konfirmasaun uluk ho Governu tanba matebian ninia kontribuisaun hanesan mensiona iha leten.

Matebian moris iha loron 8 fulan jullu tinan 1975, iha suku Lelalai Makoloso, Postu administrativu Quelicai, Munisípiu Baucau, iha maun-alin hamutuk na’in hitu, feto na’in ida no mane na’in neen.

Guntur hakotu iis iha sala ICU-HNGV iha sabadu, ohin, tuku 4:00  madrugada, husik hela nia kaben ho oan na’in lima, mane haat feto ida.

Guntur sai hanesan membru Parlamentu Nasionál (PN) ne’ebé eleitu hosi Partidu Libertasaun Populár (PLP).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here