Diretór Jerál DNRN, Crisogno da Costa Neto. Imajen Tatoli/Domingos Piedade

DILI, 22 janeiru 2021 (TATOLI)–Sidadaun estranjeiru ne’ebé hakarak hetan nasionalidade Timor tenke halo rekerimentu ba Ministériu Justisa (MJ) liuhosi Diresaun Jerál Servisu Rejistu Notariadu (DGSRN).

Diretór Jerál Rejistu Notariadu, Crisogno da Costa Neto, esplika rekerimentu hirak-ne’e tenke aprezenta ho dokumentu komprovativu pesoál depois halo verifikasaun no submete ba teste.

Notísia Relevante : MJ sei sertifika sidadaun estranjeiru 120 sai sidadaun Timor

Nia klarifika rekizitu ba sidadaun estranjeiru tipu nasionalidade por kazamentu (kaben ho ema timor-oan) maka tenke iha sertidaun kazamentu hosi igreja, hela iha Timor mínimu tinan-lima (5) no másimu tinan-10 ba leten, tenke iha vistu no pasaporte hosi nasaun orijen, vistu rezidénsia permanénsia iha Timor no sertidaun moris.

Sertifikasaun nasionalidade ne’e liuhosi kategoria tolu hanesan por kazamentu (kaben ho ema timor-oan), naturalizasaun no naturalizasaun hosi altu relevante.

“Hafoin hatama rekerimentu ba Ministru Justisa no Ministru hatún despaxu ba Diresaun Jerál Servisu Rejistu Notariadu hodi halo prosesu koordena ho Ministériu Edukasaun (ME) hodi realiza teste ezame eskrita no orál,” Crisogno da Costa Neto, hateten ba Agéncia Tatoli, sesta ne’e, iha nia servisu fatin iha Dili.

Nia hatutan, teste ne’e sei kobre matéria sira hanesan lingua ofisiál Tetun, Portugés, kultura Timor, lei sira ne’ebé aplika hanesan nasionalidade, konstituisaun, marxa (hinu), bandeira no seluk tan.

“Prova ida ne’e hanesan baibain sira tenke hatene bainhira liu valór 60 maka pasa ne’ebé durante ne’e aplika rigór tebes,” Crisogno da Costa hateten.

Nia hatutan, bainhira pasa ona iha faze teste parte notariadu sei hato’o fila-fali ba Ministériu Públiku (MP) hodi verifika iha rejistu kriminál ka la’e.

Prosesu tuir mai konklui loos hotu ona mak Ministru Justisa sei hatún fila-fali despaxu públiku ona iha Jornál Repúblika hafoin parte servisu notariadu emite sertifikadu sai sidadaun Timor.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here