Ofisiail Funsionariu husi Ministeriu Solidaderidade kontinua atende no halao pagamentu subsidiu $200 ba komunidade sira. Imajen TATOLI/Antonio Goncalves

DILI, 22 janeiru 2020 (TATOLI)–Governu liuhosi Ministériu Solidariedade Sosiál no Inkluzaun (MSSI), semana oin, sei halo pagamentu subsídiu $200 ba reklamante sira iha Rejiaun Adminitrativa Espesiál Oé-Cusse Ambeno (RAEOA).

Notísia Relevante: Governu halo ona pagamentu subsídiu $200 ba reklamante hamutuk 5.281

“Ita sei halo pagamentu subsídiu $200 ba reklamante sira iha RAEOA hamutuk 659, no ita sei realiza iha loron 25-30 Janeiru tinan ne’e,” Rui Manuel Gago Exposto, hateten ba Agênsia TATOLI iha nia knaar fatin, Caicoli, Dili, sesta ne’e.

Nia hatutan, tanba ne’e mak ohin ekipa tekniku hosi Ministériu Soslidariedade Sosiál no Inkluzaun (MSSI) nian aranka ona ba Oé-Cusse hodi halo preparasaun ba pagamentu refere.

Kona-ba prosesu pagamentu, nia dehan, lala’ok nafatin hanesan pagamentu dahuluk nian.

Nia hateten, pagamentu ba reklamante sira iha RAEOA la’o tuir nafatin regra Ministériu Saúde (MS) no Organizasaun Mundiál Saúde (OMS) nian no respeita protokolu, hodi la’o tuir nafatin mekanizmu hanesan uluk.

“Ita konsidera distánsia sosiál no espera katak buat hotu la’o di’ak. Nune’e, autoridade lokál sira prepara ninia prosesu pagamentu nafatin hanesan uluk. Baibain xefe suku sira mai foti osan ba kada sub-rejiaun mak ba halo pagamentu,” nia dehan.

Tuir nia, pagamentu ba RAEOA sei la’o durante loron neen (6) tanba Prezidente RAEAO, Arsénio Bano, nia sujestaun entaun MSSI la’o tuir de’it saida mak Prezidente RAEAO husu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here