Diretor Jeral MSSI, Rui Manuel Gago Exposto

DILI, 12 janeiru 2020 (TATOLI)–Diretór Jerál Ministru Solidariedade Sosiál no Inkluzaun (MSSI), Rui Manuel Gago Exposto, hateten Governu liuhosi ekipa Ministériu Solidaridade Sosiál no Inkluzasaun (MSSI)  to’o horisehik (11/2021), halo ona  pagamentu subsídiu $200 ba reklamante hamutuk 5.281.

Notísia Relevante: Governu sei halo pagamentu subsídiu $200 faze daruak ba reklamante sira

“Prosesu pagamentu ita hahú iha loron 08 janeiru 2021, entaun to’o horseik ne’e ita halo ona pagamentu ba uma-kain hamutuk 5.281 no  osan ne’ebé ita selu ona hamutuk milliaun $1,056,200,” Diretór Jerál MSSI, Rui Manuel Gago Exposto, hateten ba Agênsia TATOLI iha nia knaar fatin Edifísiu MSSI, Caicoli, Dili, tersa ne’e.

Nia hatutan, prosesu pagamentu ba Munisípiu Aileu  selu ona uma-kain 84, Ainaro uma-kain 268, Baucau uma-kain 470, Bobonaro uma-kain 368, Covalima uma-kain 254, Dili uma-kain 1.211, Ermera uma-kain 862, Liquisa uma-kain 358, Manatuto uma-kain 209, Manufahi uma-kain 235, no Viqueque uma-kain 591.

Nia infoma, pagamentu subsídiu $200 ba reklamante kuaze munisípiu sira-ne’e finaliza hotu ona no agora hela Dili mak seidauk tanba númeru reklamante Dili nian boot liu munisípiu sira seluk.

“Pagamentu ba reklamante munisípiu ramata ona maibé dadus mak seidauk tama mai ami-nia serve, tanba ne’e bainhira dadus sira ne’e haruka ona mai ami-nia tékniku sira haree ona mak, ami atualiza finál ba públiku tanba pagamentu ba 11 munisípiu hotu ona hela Dili mak  nafatin halo pagamentu no sira tenta aban lae bainrua hotu ona,” nia subliña

Nia afirma, durante ekipa pagamentu tuun ba terrenu halo pagamentu ba reklamante sira la hamosu  tan reklamante foun ruma tanba Governu la fó ona oportunidade ba komunidade hatama tan  lista reklamasaun.

Totál rekolamante iha territóriu Timor-Leste hamutuk 12.597 no hosi totál reklamante 12.597 ne’e Governu selu ona uma-kain 5.281 no hela mak uma-kain 7.316 mak seidauk selu, maibé ne’e inklui ho reklamante hosi Rejiaun Administrativa Espesiál Oé-cusse Ambeno (RAEOA).

Notísia Relevante: MF manda ona lista pagamentu reklamante subsídiu uma-kain ba BNCTL

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here