Polísia sobu estátua Nossa Senhora de Assunção tanba deskonfia subar droga iha laran. Maski nune'e, hafoin sobu, la deteta droga iha laran. Imajen Tatoli/António Gonçalves

DILI, 21 janeiru 2021 (TATOLI)–Ekipa konjunta Servisu Investigasaun Kriminál Nasionál (SIKN), Polísia Militár (PM), Servisu Nasionál Intelijénsia (SNI) no Alfándega liuhusi Departamentu Antí-Fraude la identifika materiál droga iha illas Nossa Senhora de Assunção nia laran.

Iha prosesu identifikasaun ne’ebé hala’o Kuartél Jerál PNTL, Dili, kinta ne’e, parte investigasaun lori gurinda ko’a uluk fatin hatúr illas Nossa Senhora hodi halo identifikasaun ba objetu rua ne’ebé falun metin ho hena mutin ne’ebé uza lem hodi taka hale’u objetu refere.

Notísia relevante: Polísia hein Dioseze Dili fó autorizasaun sobu Illas Nossa Senhora de Assunção

Durante prosesu sobu, ekipa foti mós amostra rai mean (tizolu) ne’ebé deskonfia hodi lori halo teste iha laboratóriu, maibé la identifika tanba objetu rai rua ne’ebé parte seguransa deskonfia nu’udar  materiál halo-todan (pemberat) ne’ebé tékniku monta hodi hatuur metin illas  Nossa Senhora.

Prosesu identifikasaun hala’o iha tuku 13:35 no ramata iha 16:20 Otl, asiste direta hosi Komandante Jerál PNTL, Komisáriu Polísia, Faustino da Costa, Komandante SIKN, José Neto Moc, parte Autoridade Aduaneira no  ekipa investigasaun sira kompostu ema na’in hitu (7) ne’ebé antes ne’e asiste direta prosesu scan illas Nosa Senhora de Assunção  iha mákina X-Ray ne’ebé hala’o ona iha Aeroportu Internasionál Nicolau Lobato, Comoro, Dili, iha loron 19/1/2021 iha 03:30 Otl.

Prosesu ko’a illas Nossa Senhora ne’e akompaña direta hosi madre na’in rua hosi ADM Ailok-Laran, Dili, hanesan Madre Gorreti Delicia Fernandes no Virginia dos Santos nu’udar sasin hosi parte Igreja nian.

Tuir loloos, Pároku Parókia São Paulo Lospalos, Pe. Thomas Gusmão de Carvalho mós atu partisipa prosesu halo identifikasaun, maibé tanba okupadu entaun na’i-lulik ne’e la konsege partisipa no akompaña de’it informasaun hosi madre na’in rua.

Estátua ne’e rasik hafoin lori ba Lospalos seidauk bele hetan bensaun, tanba parte Igreja sei hein prosesu investigasaun ramata mak sei lori fali bá Lospalos  hodi hatúr iha Igreja Maupitine-Lautém.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here