Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo. Imajen Tatoli/Eugénio Pereira.

DILI, 21 janeiru 2021 (TATOLI)–Komandu Polísia Nasionál Timor-Leste (PNTL) sei hein desizaun Dioseze Dili fó autorizasaun ba autoridade seguransa hodi sobu Illas Nossa Senhora de Assunção ne’ebé deskonfia rai materiál droga iha laran.

Portavóz Polísia Nasionál Timor-Leste (PNTL), Superintendente Xefe, Arnaldo de Araújo deklara ekipa konjunta Servisu Investigasaun Kriminál Nasionál (SIKN), Polísia Militár (PM), Servisu Nasionál Intelijénsia (SNI) no Alfándega liuhusi Departamentu Antí-Fraude lori ona Illas Nossa Senhora de Assunção hodi teste iha mákina X-Ray identifika rai materiál balun iha laran.

Notísia relevante: SIKN sei sobu Illas Nosa Senhora de Assunção ne’ebé deskonfia rai droga

Arnaldo hatutan, tuir ajenda, loloos ne’e ohin tuku 14:00 Otl mak parte ekipa konjunta atu loke estátua ne’e, maibé seidauk hetan konfirmasaun hosi parte Igreja.

“Ami halo koordenasaun ho Komandante Servisu Investigasaun Kriminál Nasionál (SIKN) dehan ami hein de’it ohin ka aban mak sobu. Ita sei hein parte Igreja nian para bele hatene materiál ne’ebé ita deskonfia iha laran,” Arnaldo ba jornalista iha Kuartél Komandu Jerál PNTL, Caicoli, Dili, kinta ne’e.

Nia informa, Komandu PNTL respeita tebes Igreja Katólika, tanba ne’e tenke hein desizaun Igreja Katólika fó autorizasaun mak bele loke hodi labele hamosu problema no interpretasaun oin-oin.

“Ita hotu-hotu respeita, tanba na’in mak Igreja Katólika. Polísia labele loke bainhira Igreja la marka prezensa,” Arnaldo haklaken.

Entretantu, to’o notísia ne’e hatún, Agência Tatoli tenta konfirma asuntu ne’e ba parte Dioseze Dili, maibé seidauk hetan konfirmasaun. Partre Dioseze Dili no Baucau rasik simu ona relatóriu hosi Pároku Igreja São Paulo Lospalos, Pe. Thomas Gusmão de Carvalho, ne’ebé aprezenta mós ninia sasin ba PNSIK.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here