Prosesu identifikasaun ba illas Nossa Senhora de Assunção iha Kuartél Jerál PNTL, Caicoli, Dili, 21 janeiru 2021. Hafoin sobu estátua ne'e, la deteta droga iha laran. Imajen Tatoli/António Gonçalves

DILI, 21 janeiru 2021 (TATOLI)–Komandante Jerál Polísia Nasionál Timor-Leste (PNTL), Komisáriu Polísia, Faustino da Costa husu deskulpa ba Igreja Katólika tanba la deteta droga iha illas Nossa Senhora de Assunção nia laran.

Komisáriu Faustino esplika, tuir lei, parte seguransa iha kompeténsia atubele halo pasarevista ba kualker objetu ne’ebé deskonfia tenke sobu para bele justifika ninia verdadeira.

“Ne’e servisu. Bainhira iha ona informasaun hanesan ne’e, ita tenke buka para halo identifikasaun hodi fó informasaun ne’ebé loloos ba ita-nia sosiedade. Ami agradese tebes ba madre sira-nia prezensa ne’ebé koopera tebes hodi ita halo identifikasaun, no ita hotu sai sasin haree direta laiha buat ruma,” nia dehan iha fatin investigasaun SIKN, Komandu Jerál PNTL, Dili, kinta ne’e.

Notísia relevante:Polísia la deteta droga iha illas Nossa Senhora de Assunção 

Faustino haktuir, Prezidente Repúblika, Francisco Guterres rasik preokupa ho problema ne’e, maibé Komisáriu hatán katak parte PNTL halo hela identifikasaun.

“Presidente Repúblika mós preokupa ba kestaun ne’e no husu ba ha’u, maibé ha’u hatán, prosesu ne’e halo ona identifikasaun,” nia tenik.

Komandante PNTL mós fó kedas orientasaun ba ekipa investigasaun hodi buka meiu lori lem fox hodi junta filafali objetu ne’ebé sobu para bele hatúr metin illas Nossa Senhora hodi kontinua entrega ba Parókia Lospalos.

Iha fatin hanesan, reprezentante Madre Kasih Mulia ADM Ailok-Laran, Gorreti Delicia Fernandes hato’o agradese ba ekipa servisu investigasaun ne’ebé hatudu lia-loos iha prosesu investigasaun to’o sobu illas Nossa Senhora la deteta ai-moruk droga ruma iha laran.

Madre Gorreti konta ba Komandante Jerál PNTL katak estátua ne’e Pároku Parókia Lospalos hameno no sosa iha Jogyakarta-Indonézia mai Timor-Leste, liuhusi fronteira terreste to’o iha Postu Integradu Batugade iha 02 dezembru 2020, no lori bá Lospalos iha 05 dezembru 2020.

“Ami mak sosa estátua ne’e atu lori bá madre sira iha Lospalos. Ami husu deskulpa karik iha tempu ne’ebá estátua ne’e lori to’o mai Madre-Boot ba to’o fronteira hodi asina deklarasaun ba Alfándega. Depois parte polísia bá foti, ho haraik-an ami mós entrega illas Nossa Senhora,” Madre haktuir.

Nia hatutan, Pároku Parókia São Paulo Lospalos, Thomas Gusmão de Carvalho rasik ohin kontaktu nia via telefone hodi husu ba Komandu PNTL atu klarifika informasaun ne’e através mídia hodibele fó informasaun ba sosiedade katak estátua ne’e la tau droga iha laran.

Madre tenik, hafoin problema ne’e akontese, ema balun kontaktu ba madre hodi akuza katak “fa’an Nai Maromak”, maibé Madre-Boot hatán katak buat hotu- hotu só rezultadu investigasaun mak bele justifika nia verdadeira.

“Ema balun dehan madre sira mai fa’an Maromak. Ami la fa’an Maromak. Realidade deskobre ona. Ami mós husu deskulpa ba sarani sira, no obrigadu barak ba polísia basá bele deskobre informasaun importante ne’ebé ba ita hotu nia di’ak,” Madre agradese.

Nia hateten, sira nia parte sei akompaña prosesu lori estátua ne’e bá Lospalos no sei halo selebrasaun misa boot no fó bensaun hodi husu deskulpa ba illas Na’i Maromak ne’e hodi tau fiar metin liután ba sarani Katólika Timor-Leste.

 Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here