Diretór Ezekutivu Centro Nacional Chega (CNC), Hugo Maria Fernandes. Imajen/Mídia CNC.

DILI, 21 janeiru 2021 (TATOLI)—Diretór Ezekutivu Centro Nacional Chega (CNC), Hugo Maria Fernandes, informa, tinan ne’e Centro Nacional Chega (CNC) ho Ministériu Edukasaun Juverntude no Desportu (MEJD) kontinua halo revizaun ho materia edukasaun sidadania, direitu umanu, istória hosi konteudu relatóriu “Chega!” no jeografia ba kuríkulu ensinu nian iha segundu siklu no terseiru siklu.

Notísia Relevante: Tinan ne’e, CNC iha atividade Akampamentu Chega ba estudante sira

Hugo Fernandes hatutan, kona-ba revizaun refere CNC sei kontrata fali konsultór hodi halo revizaun no avaliasaun ba matéria para sei enkaixa fali konteudu ‘Chega!’ nian ba kuríkulu ne’e nia-laran, no tinan ne’e mak CNC kompleta hotu matéria rua ne’e entaun signifika integra hotu ona matéria rua iha eskola primária to’o sekundária nian.

“Tinan ne’e, CNC hamutuk ho MEJD halo revizaun no elabora fali matéria edukasaun, sidadania, direitu umanu, istória, no jeografia ba segundu siklu no terseiru siklu nian. Kona-ba revizaun ne’e, CNC sei kontrata fali konsultór hodi halo revizaun no avaliasaun ba matéria para enkaixa fali konteudu ‘Chega!’ nian ba kuríkulu ne’e nia-laran. Se tinan ne’e mak ita kompleta hotu matéria rua ne’e, entaun signifika ita integra hotu ona matéria rua iha eskola primária to’o sekundária nian. Ha’u garante tanba MEJD simu hotu kedas rekomendasaun sira-ne’ebé mak ami haruka ba,” Diretór Ezekutivu CNC, Hugo Maria Fernandes, hateten ba Agência TATOLI iha nia knaar fatin, Antigu Komarka, Balide, Dili, kinta ne’e.

Nia hateten, agora hein de’it MEJD introdús matéria sira-ne’ebá ba profesór sira maibé fila-fali ba MEJD bainhira mak sira bele introdús matéria ne’e. BainhiraMEJD aseita ona kuríkulu ne’e, entaun sira tenke hatama ba livru hodi manorin sira bele utiliza no bainhira loos hotu ona mak sei fó formasaun ba profesór sira hodi fó hanorin labarik sira iha eskola.

Kona-ba produsaun livru ba matéria rua ne’e, nia hateten, ne’e Ministériu Edukasaun Juventude no Desportu (MEJD nia kompeténsia tanba Centro Nacional Chega (CNC) nia kompeténsia mak elabora konteudu relatóriu CAVR “Chega!” nian ba kuríkulu.

Tanba, nia esplika, tuir dekretu-lei númeru 48/2016, katak elabora kurikulu hosi konteudu relatóriu “Chega!” tama ba kuríkulu ensinu nian, entaun iha mandatu ne’e mak iha tinan 2018 ne’e CNC ho Ministériu Edukasaun Juventude no Desportu (MEJD) hametin kooperasaun liuhosi selebra MoU ida.

Ho dekretu-lei refere, nia dehan, CNC halo kontrata ba konsultór Timoroan na’in-rua (2) hodi halo obervasaun ba kurrikulu ne’ebé mak eziste mak iha kurrikulu rua mak hanesan kurikulu kona-ba edukasaun sidadania no direitu umanu, no ida seluk mak istória no jeografia.

“Ida ne’e ba nivel eskolaridade terseiru siklu nian. Bainhira ita konkorda hotu tiha mak ami submete ba MEJD. Depois MEJD adopta kurrukulu ne’ebé mak CNC sujere ba hodi tama ba iha parte revizaun kurrikulu nian ne’e,” nia esplika.

Maibé, nia haktuir, tanba Dotasaun Orsamentál Temporária (DOT) ne’e la’o to’o fulan 10 nia-laran mak MEJD la konsege finaliza tanba orsamentu normál ne’e fulan rua (2) de’it, entaun labele fó formasaun ba profesór sira kona-bá oinsá hanorin materia rua ne’e ba alunu sira.

“Maibé, materia rua ne’e, ita integradu ona iha revizaun kurrikulu MEJD nian. Ita hein de’it, bainhira mak halo publikasaun no implementsaun ba materia rua ne’e hosi MEJD,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here