Diretor Ezekutivu CNC, Hugo Fernandes. Imajen TATOLI/Osória Marques

DILI, 21 janeiru 2021 (TATOLI)–Diretór Ezekutivu Centro Nacional Chega (CNC), Hugo Maria Fernandes hateten, tinan ne’e, CNC iha atividade foun hanesan Akampamentu Chega ba estudante sira iha loron feriadu nian.

“Iha tinan ida-ne’e, CNC mós iha programa foun ne’ebé sei hala’o mak programa Akampamentu Chega nian ba estudante sira bainhira iha feriadu loron rua to’o loron lima nia laran,” Hugo Maria Fernandes hateten ba Agência TATOLI iha nia knaar fatin, Antigu Komarka, Balide, Dili, kinta ne’e.

Nia hatutan, programa Akampamentu Chega ne’e sei halo koordenasaun ho Ministériu Edukasaun no Sekretáriu Estadu Juventude no Desportu (MEJD) hodi utiliza tempu fériaadu eskola nian. Tanba, ho akapamentu ne’e CNC bele mobiliza fali estudante sira atu la’o tuir ain-fatin istória sira uluk nian.

Nia hatutan, la’ós de’it halo Akampamentu Chega nian maibé sei iha formasaun hosi entidade balun ka hosi veteranu ka ema rezisténsia sira iha tempu kalan.

“Ita hakarak realiza akampamentu ne’e tanba ita hakarak lori ita-nia jerasaun foun ba haree realidade. Nune’e, ita mós sente katak agora de’it la’o kolen, satán tempu uluk ita la’o dook no tauk,” nia dehan.

Nia hateten, liuhosi Akampamentu Chega ne’e bele esplika ba jerasaun foun sira kona-ba luta ba ukun rasik-aan ba rai ida-ne’e. Iha akampamentu refere, tuir nia, sei rona direta istória hosi autór ba luta no hetan informasaun hosi lideransa sira kona-ba oinsá mak funu no memória istória pasada ne’e akontese.

Aleinde ida ne’e, nia hateten, iha atividade Akampamentu Chega ne’e iha mós programa edukasaun kreativu ne’ebé mak atu introdús “Chega!” ho maneira kreativu ne’ebé mak iha tinan kotuk CNC realiza certame ba nível eskola sekundária sira.

“Ita hamutuk ho Ministériu Edukasaun Juventude no Desportu (MEJD) realiza certame ne’e atu introdús ba ba estudante sira kona-ba istória Timor-Leste nian,” nia dehan.

Jornalista: Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here