Primeiru-Ministru, Taur Matan Ruak. Imajen TATOLI/Egas Cristovão

DILI, 21 janeiru 2021 (TATOLI)--Primeiru Ministru (PM), Taur Matan Ruak, hateten nia parte prontu atu vasina “dahuluk” ai-moruk AstraZeneca atu fó garantia ba sidadaun simu vasina prevene COVID-19.

“Ha’u prontu vasina tanba ha’u la tauk vasina, tanba laiha dalan seluk,” PM Taur afirma, hodi hatan perguntas jornalista, ne’ebé husu prontidaun simu vasina dahuluk, iha ámbitu enkontru ho Prezidente Repúblika, Francisco Guterres ‘Lú Olo, iha Pálasiu Prezidensiál, Bairro Pité, kinta ne’e.

Iha enkontru semanál ne’e, parte rua diskute mós kona-ba esforsu Estadu Timor-Leste atu hetan ai-moruk vasina, ne’ebé daudaun ne’e Governu esforsu atu asesu.

Nune’e, Xefe Governu enkoraja sidadaun hotu atu simu vasinasa atubele prevene-an ba COVID-19, tanba moras ne’e bele fó risku va vida.

“Se mak lakohi mate tenke simu vasina, hakarak mate la simu vasina mós laiha buat ida tanba  se mak lahatene moris di’ak liu mate, entaun ha’u hakarak moris entaun ha’u tenke simu vasina,” PM enkoraja.

Entertantu, Governu hahú harii komisaun interministeriál ida ho komisaun tékniku ida atu prepara planu.

Komisaun ne’e lidera hosi Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, atu hahú haree preprativu hotu to’o implementa vasina ne’e.

Ai-moruk vasina ne’e, empreza framaséutika AstraZeneca hahú inísia halo teste ba faze da-toluk ne’ebé iha kombinasaun anti-korpu monoklonál ho esperansa uzu ba profilátiu atu prevene infesaun COVID-19 ba pesoál ne’ebé hetan risku.

Teste medikál internasionál ai-moruk ba faze da-toluk ne’e sei hahú avalia ninia seguransa no efikásia, ba anti-korpu ne’ebé koñesidu ho AZD7442.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here