Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 14 janeiru 2021 (TATOLI) – Tribunál Distritál Dili (TDD) husu Parlamentu Nasionál (PN) atu hasai imunidade ba membru Parlamentu Nasionál (PN) hosi Bankada Partidu Demokrátiku (PD), António da Conceição ‘Kalohan’ hodi bele marka prezensa iha Tribunál.

Juis titulár, Ivan Suritai, hateten antes ne’e Tribunál haruka ona karta ba Prezidente Parlamentu Nasionál (PPN) hodi husu levantamentu imunidade deputadu Kalohan nian, maibé iha resposta hosi PPN ba Tribunál la klaru katak, iha hela ajenda importante ruma ka razaun polítika nune’e la permite atu marka prezensa iha Tribunál.

Nia hatutan, tuir lei prosesuál labele hala’o julgamentu ba prosesu ne’e iha arguidu na’in-lima maibé prezensa na’in-haat no arguidu António da Conceição la marka prezensa no arguidu hanesan membru parlamentu lei próteze atu ba presta deklarasaun ruma iha autoridade judisiál presiza hasai imunidade.

“Tribunál sei solisita fila-fali ba Prezidente Parlamentu Nasionál atu hasai imunidade Deputadu António “Kalohan” nian,’’ Juis Ivan Suritai, pronunsia iha sala audiénsia julgamentu iha TDD.

Tuir ajenda loloos ohin Tribunál rona deklarasaun arguidu sira nian,  maibé la konsege no Tribunál rasik tenta esforsu hotu tau ona naran arguidu António da Conceição iha sistema hodi haruka ona karta PPN ,maibé ikus mai resposta PPN ladún klaru, nune’e suspende fila-fali julgamentu ne’e ba iha loron 8 abríl 2021 iha tuku 9:00 Otl.

Julgamentu ne’e mós adia dala dala barak ona iha 2019, 2020 no ohin kontinua adia. Nune’e, Juis Ivan Suritai, hateten laiha prezensa arguidu António da Conceição nian prejudika mós arguidu sira seluk tanba prosesu ne’e kompleta tinan rua ona.

Tuir lei kuandu prosesu ne’e tama ona iha Tribunál adia beibeik lori tempu kleur faktu prova akuzasaun ne’ebé aprezenta hosi Ministériu Públiku (MP) nu’udar na’in ba asaun titulár penál bele hetan nulidade ka nulu. Nune’e Prokuradór Rogeiro Viegas, husu Parlamentu Nasionál atu urjentemente hasai imunidade Deptadu António “Kalohan” nian hodi kolabora ho justisa.

Nia dehan, PN bele hasai ona imunidade tanba iha loron hirak liu-ba PN rasik hasai ona imunidade António da Conceição sai sasin hodi presta deklarasaun iha MP.

Tuir informasaun ne’ebé Agência Tatoli asesu hosi MP prosesu ne’e rejista ho númeru NUC 0075/17PGGCC, MP dedus akuzasaun ho husu julgamentu iha intervensaun Tribunál koletivu, tuir artigu 236 no 14 hosi kódigu prosesu penál.

Hodi notifika arguidu/a na’in-lima ho inisiál ADC, JIB, GPSC, nu’udar kargu xefia iha Ministériu Komérsiu Indústria no Ambiente (MCIA), PMCSV nu’udar Diretór hosi kompañia ida no arguidu António da Conceição nu’udar Ministru MCIA.

Faktu ne’ebé arrola hosi MP katak iha tinan 2014, MCIA iha osan atu sosa ekipamentu diversu hosi orsamentu kapitál menór ho montante global $200,000.00.

Hafoin ne’e MCIA loke konkursu públiku kompañia Kninuk Star Unipessoal Lda, sai vensedór hodi asina kontratu ho MCIA ho montante global $191,000.00, ne’ebé ikus mai Tezouru Ministériu Finansas halo pagamentu ho montante refere ba kompañia, maske iha realidade ekipamentu laboratóriu indústria sira refere, kompañia foin fornese mai iha MCIA, iha fevereiru 2015, fulan-rua depois halo tiha pagamentu, maske nune’e, ekipamentu sira kompañia hatama la kompletu to’o novembru 2015, hodi prejudika ekipamentu sira balun labele funsiona, no la utiliza to’o agora, hodi hamosu prejuizu ba Estadu Timor-Leste ho valor $143,500.00.

MP akuza arguidu/a sira ho krime pekulatu ne‘ebé previstu no punidu hosi art. 295 n° 1, krime partisipasaun ekonomia iha negósiu no administrasaun danoza, ne’ebé previstu no punidu hosi art. 299 n°. 2, no art. 274 n°. 2, krime burla agravadu, falsifikasaun dokumentu, ne’ebé previstu no punidu hosi art. 266 no 267 n°. 1, art. 274 n° 2 no art. 303, hotu-hotu hosi kódigu penál Timor-Leste.

Kona-ba akuzasaun MP nian kompletu Tribunál seidauk lee sai hodi hein julgamentu tuir mai.

Mezmu prosesu julgamentu labele realiza no arguidu na’in-haat seluk hetan asisténsia legál hosi advogadu privadu Sergio Lobo, Januário Martins, Câncio Freitas, José no defensór públiku na’in ida.

PN autoriza deputadu na’in-rua no deputada ida presta deklrasaun iha MP

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here