Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 20 janeiru 2021 (TATOLI)–Prezidente Komisaun A (Justisa no Konstitusionál), Deputadu Joaquim dos Santos ‘Boraluli’ hateten bankada Congresso Nacional de Reconstrução de Timorense (CNRT) la fó impaktu ba ezekusaun Orsamentu Jerál Estadu (OJE) tinan fiskál 2021.

Notísia Relevante: Bankada CNRT klarifika razaun husu fiskalizasaun abstrata kona-ba OJE 2021

“Pedidu fiskalizasaun abstrata ba OJE 2021 ne’ebé CNRT hato’o ba Tribunál Rekursu ne’e sei la implika (la fó impaktu) ba ezekusaun orsamentu,” Prezidente Komisaun A ne’e ko’alia iha resintu Parlamentu Nasionál, kuarta ne’e.

Tuir nia, pedidu bankada CNRT só kestiona artigu balun iha lei Orsamentu Jerál Estadu 2021 tanba ne’e totalmente sei laiha impaktu ruma.

Deputadu Joaquim dos Santos fundamenta, artigu hirak ne’ebé bankada CNRT kestiona ne’e parte relevante rezolve tiha ona. Nia hatutan, notifikasaun ne’ebé Tribunál Rekursu notifila Parlamentu Nasionál to’o oras ne’e Komisaun A seidauk asesu.

Entretantu Bankada CNRT klarifika ona razaun husu fiskalizasaun abstrata kona-ba OJE 2021 ba Tribunál Rekursu, iha loron tersa ne’e.

Bankada CNRT halo pedidu Fiskalizasaun Abstrata ba Orsamentu Jerál Estadu 2021 tanba artigu 150, alínea (e) husi Konstituisaun Repúblika maka fó dalan.

Bankada CNRT laiha intensaun atu blokeia funsionamentu Governu nian ka Impede OJE 2021, maibé Bankada CNRT konsidera OJE 2021 viola regra Konstitusionál no Lei Orsamentu e Jestaun Finanseira. Tanba ne’e maka Bankada CNRT halo pedidu fiskalizasaun abstrata ba OJE 2021.

Bankada CNRT la partisipa iha diskusaun espesialidade ba OJE 2021 la signifika katak Bankada CNRT labele halo fiskalizasaun abstrata ba OJE 2021.

Deputada Bankada CNRT Carmelita Caetano Moniz, esplika OJE 2021 latuir Konstitusaun RDTL artigu145 ne’ebé hateten orsamentu jerál estadu tenke kaer ba prinsípiu efikánsia no efisiénsia maibé bankada CNRT haree la kaer ba prinsípiu ne’e tanba OJE 2021 prevee fali millaun $14 ba Ró Haksolok.

Nune’e mós lei OJE 2021 la kumpri LOGF ne’ebé sai nu’udar matadalan ba OJE, tanba hahú hosi estrutura orsamentál la prienxe, tenke iha kapítulu, títulu no tenke kompleta ho verba sira, livru orsamentál hamutuk sia (9) la hanesan ne’ebé xoke malu tún sa’e.

Nia fundamenta, lori fali lei OJE 2021 atu altera fali LOGF tanba LOGF dehan trasnferénsia entre rúbrika labele liuhosi 20% maibe lei OJE 2021 artigu 14 bele halo transferénsia entre rúbrika liu 20%.

“Agora tau orsamentu por programa, Governu lafiar-aan fali, katak bele halo transferénsia entre rúbrika. Se ita tau por programa tenke fiksu. Programa la ezekuta, orsamentu mós la gasta. Buat hirak ne’e hotu mak motiva ami husu fiskalizasaun abstrata,” nia argumenta.

Nia hatutan, lei OJE 2021 viola LOGF komesa hosi artigu 23, 26, 37 no artigu 38.

Notísia Relevante: TR notifika PN kona-ba OJE 2021

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here