Bankada Congresso Nacional de Reconstrução de Timorensse (CNRT) hala’o konferénsia Imprensa. Imajen TATOLI/Evaristo Soares Martins.

DILI, 19 janeiru 2021 (TATOLI)–Bankada Congresso Nacional de Reconstrução de Timorensse (CNRT) husu fiskalizasaun abstrata ba Tribunál Rekursu tanba Orsamentu Jerál Estadu (OJE) 2021 viola regra konstitusionál no Lei Orsamentu no Jestaun Finanseira (LOGF-sigla portugés).

Notísia Relevante: Bankada Plataforma Entendimentu kestiona koerénsia bankada CNRT

“Relasiona ho fiskalizasaun abstrata ba Orsamentu Jerál Estadu 2021, ne’ebé Bankada CNRT submete ba Tribunal Rekursu tanba Bankada CNRT konsidera OJE 2021 viola regra Konstitusionál no Lei Orsamentu e Jestaun Finanseira,” Vise-Xefe Bankada CNRT, Deputadu Patrocínio Fernandes dos Reis, informa liuhosi konferénsia imprensa, iha PN, tersa ne’e.

Bankada CNRT halo pedidu Fiskalizasaun Abstrata ba Orsamentu Jerál Estadu 2021 tanba artigu 150, alínea (e) hosi Konstituisaun Repúblika mak fó dalan.

Bankada CNRT laiha intensaun atu blokea funsionamentu Governu nian ka Impede OJE 2021, maibé Bankada CNRT konsidera OJE 2021 viola regra Konstitusionál no Lei Orsamentu e Jestaun Finanseira. Tanba ne’e mak Bankada CNRT halo pedidu fiskalizasaun abstrata ba OJE 2021.

Bankada CNRT la partisipa iha diskusaun espesialidade ba OJE 2021 la signifika katak Bankada CNRT labele halo fiskalizasaun abstrata ba OJE 2021.

Bankada CNRT iha obrigasaun atu asegura katak Lei Orsamentu Jerál Estadu tenke iha konformidade ba Konstituisaun no Lei Orsamentu no Jestaun Finanseira.

Bankada CNRT submete Fiskalizasaun Abstrata ba OJE 2021 la’ós tanba dezespera ba ukun maibé Bankada CNRT defende Konstitusionalidade no Legalidade OJE 2021 nian.

“Relatóriu Komisaun A no Komisaun C mós mensiona katak OJE 2021 iha violasaun hasoru Konstituisaun no Lei valór reforsadu sira,” Vise-Xefe Bankada CNRT ne’e hateten.

Bankada opozisaun ne”e konsidera deklarasaun Bankada Governu nian reflete katak afinál das contas durante ne’e Bankada FRETILIN halo fiskalizasaun abstrata ba OJE 2008, 2009, 2010, 2011, 2018, no 2019 tanba Bankada FRETILIN dezespera ba ukun.

Bankada CNRT dezmente alegasaun katak durante kaer pasta nu’udár Primeiru Ministru, Maun Bot Kay Rala Xanana Gusmão obriga Parlamentu Nasionál ajenda sesaun estraordinária ho plenária taka odamatan hodi impoin aprovasaun ba rezolusaun hodi duni sai majistradu na’in 40 husi Portugal.

“Plenária estraordinária ne’ebé Bankada Governu mensiona ne’e kabe ba kompeténsia Prezidente Parlamentu Nasionál nian. Iha altura ne’ebé, lidera hosi Prezidente Fernando Lasama Araújo. Plenária taka odamatan ne’e halo tanba debate kona-ba interese nasionál, ne’ebé Bankada FRETILIN rasik mós aprova no envolve iha debate ida-ne’e, inklui fó votu a-favór ba rezolusaun ne’ebé espulsa majistradu sira.” nia dehan.

Deputada Bankada CNRT Carmelita Caetano Moniz, reforsa OJE 2021 latuir Konstitusaun RDTL arrigu 145 ne’ebé hateten orsamentu jerál estadu tenke kaer ba prinsípiu efikásia no efisiénsia maibé bankada CNRT haree la kaer ba prinsípiu ne’e tanba OJE 2021 prevee fali millaun $14 ba Ró Haksolok.

Nune’e mós lei OJE 2021 la kumpri LOGF ne’ebé sai nu’udar matadalan ba OJE, tanba hahú hosi estrutura orsamentál la prienxe, tenke iha kapítulu, títulu no tenke kompleta ho verba sira, livru orsamentál hamutuk sia (9) la hanesan ne’ebé choque malu tún sa’e.

Nia fundamenta, lori fali lei OJE 2021 atu altera fali LOGF tanba LOGF dehan trasnferénsia entre rúbrika labele liuhosi 20% maibe lei OJE 2021 artigu 14 bele halo transferénsia entre rúbrika liu 20%.

“Agora tau orsamentu por programa, Governu lafiar-aan fali, katak bele halo transferénsia entre rúbrika. Se ita tau por programa tenke fiksu, programa la ezekuta, orsamentu mós la gasta. Buat hirak ne’e hotu mak motiva ami husu fiskalizasaun abstrata,” nia argumenta.

Nia hatutan, lei OJE 2021 viola LOGF komesa hosi artigu 23, 26, 37 no artigu 38.

Hatán ba kestaun ne’e, Deputadu Bankada Plataforma Entendimentu, Luis Roberto da Silva, hateten bankada hotu-hotu iha direitu husu fiskalizasaun abstrata maibé tenke haree ba vida nasaun nian.

“Se sira dehan OJE 2021 ne’e ilegál, ha’u nu’udar bankada Governu la konkorda ho ida-ne’e tanba nasaun ida presiza osan hodi funsiona instituisaun demokrátiku hotu-hotu, tanba OJE ne’e raan ba Estadu,” nia dehan.

Deputadu KHUNTO ne’e konsidera deklarasaun bankada CNRT la favorese ba nasaun.

“Se bankada CNRT mak ukun karik mós presiza osan. Ezemplu, ami mak iha opozisaun karik entaun sira-nia tanggapan halo nusá. Ne’e sentimentu ida-ne’ebé mak ladún furak,” Vise-Prezidente PN ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here