DILI, 20 janeiru 2021 (TATOLI)—Timor-Leste liuhosi orgaun reguladór Autoridade Nasionál Petróleu no Minerál (ANPM) iha outubru tinan ne’e, taka ona konkursu públiku mina no gás hamutuk bloku 18, kompostu hosi 11 iha tasi-laran no hitu iha rai-maran.
Antes ne’e, Governu liuhosi ANPM halo promosaun ba nasaun barak hanesan Singapura, Londres, Abu Dabi, Estadu Unidu Amérika, Austrália no nasaun seluk, inklui halo mós promosaun liuhosi konferénsia online semeira globál (Global E&P Summit), ne’ebé organiza hosi empreza IN-VR oil & Gas iha sede Reinu Unidu.
“Ha’u hanoin to’o outubru 2021, ANPM halo konkursu públiku atu define kontratu ho empreza potensiál sira hodi investe no halo dezenvolvimentu iha bloku 18 ne’ebé ita lansa ona,” Ministru Petróleu no Minerál, Víctor da Conceição Soares, informa iha Palásiu Governu-Dili, kuarta ne’e.
Notísia relevante: ANPM-Empreza IN-VR Promove Konkursu Públiku Petrolífera Hamutuk Bloku 18
Daudaun ne’e, autoridade hala’o hela promosaun ba empreza sira iha estranjeiru, liuliu kona-ba rejime fiskál, rejime legál ein termu kontratu fahe produsaun atu hahú loke konkursu públiku, ne’ebé iha ona kompañia estranjeiru balun interese halo investimentu mina no gás iha bloku 18.
Iha loron 03 outubru 2019, ANPM ho apoia hosi IN-VR Oil & Gas, realiza simeira internasionál kona-ba mina no gás Timor-Leste (Timor-Leste Oil & Gas Summit 2019) no biban ne’e Governu Timor-Leste liuhosi Primeiru-Ministru, Taur Matan Ruak, lansa ona konkursu públiku mina no gás hamutuk bloku 18.
Iha bloku hirak ne’e, iha estrutura fatuk no basia identifika ona iha estudu sízmiku katak kamada fatuk ne’ebé iha potensialidade boot bele akumula mina no gás.
Jornalista: Florêncio Miranda Ximenes
Editora: Julia Chatarina