Ministru Petróleu no Minerál, Victor da Conceição Soares akompaña Prezidente ANPM, Gualdino da Silva halo lansamentu ba eventu Online Series Timor-Leste hodi halo promosaun ba konkursu públiku Mina no Gás hamutuk bloku 18. Imajen Tatoli/ Florêncio Miranda Ximenes

DILI, 09 jullu 2020 (TATOLI)Governu Timor-Leste liuhosi orgaun reguladór Autoridade Nasionál Petróleu no Minerál (ANPM) hamutuk ho empreza IN-VR Oil & Gas, organiza Online Series Timor-Leste (OSTL) ho kompañia husi nasaun kuaze 200 hodi halo promosaun ba konkursu públiku iha área petrolífera hamutuk bloku 18, kompostu husi 11 iha tasi-laran no hitu iha rai-maran.

Eventu OSTL iha kinta ne’e lansa direita husi Ministru Petróleu no Minerál, Victor da Conceição Soares hodi fó garantia ba investidór sira katak Timor-Leste iha potensialidade ba rekursu petrólifera, enkuantu Prezidente ANPM, Gualdino da Silva halo aprezentasaun ba rekursu petrolíferu iha bloku 18.

Diretór Esplorasaun no Promosaun ANPM, Mateus da Costa, informa objetivu ba eventu OSTL ne’e hodi promove konkursu públiku petrolífera ba bloku 18 ne’ebe Timor-Leste lansa ona iha outubru 2019.

“Eventu ne’e rasik organiza husi IN-VR, hanesan kompañia organizadór eventu ida husi Londres, Reinu Unidu, ne’ebé agora daudaun ita (ANPM-Timor Leste) involve mós hanesan ita-nia marketing agency hodi bele tulun ita iha prosesu promosaun konkursu publiku refere, no tulun Timor-Leste kompete iha mundu internasionál ho nasaun sira seluk ne’ebé agora mós hala’o daudaun hela konkursu públiku,” tenik Diretór ne’e hafoin lansamentu OSTL ne’e, iha edifísiu ANPM, kinta ne’e.

Konférensia virtuál ne’e, tuir nia nu’udar parte esforsu ANPM atu nafatin promove industria setór petróleu ba mundu durante krize pandemia COVID-19 ne’ebé afeta iha mundu globál inklui Timor-Leste.

“Bázikamente ema barak no kompañia internasionál kuaze 200-resin mak akompaña promosaun ne’e liuhosi online iha nasaun Europeia, Sudeste Aziátiku, Estadu Unidu Amérika no Austrália, inklui Timor-Leste no nasaun seluk tan,” nia subliña.

Dirijente ne’e dehan, hafoin lansamentu eventu ne’e, iha mós oradór tékniku no jurídiku nível altu husi ANPM ninian, no mós péritu lubuk husi Austrália, Englatera, no Estadu Unidu Amérika, ne’ebé aprezenta mós potensialidade rekursu petróleu Timor-Leste nian tantu iha rain maran no área tasi nian.

Aleinde ne’e, iha mós aprezentasaun ka testamuña lubuk ida maihusi kompañia sira ne’ebé agora daudaun halo hela atividade petrolífera iha kampu iha rai-laran, hanesan Santos, Sunda Gas, no mós kompañia sira seluk tan.

“Ita nia eventu ne’e hetan partisipasaun másimu husi kompañia internasionál petrolífera sira no mós líder ba indústria petróleu iha rejionál no internasionál hodi rona ita-nia aprezentasaun ba rejime fiskál, rejime legál ein termu kontratu fahe produsaun, nune’e bele hada’u ema nia konfiansa mai investe ba bloku sira ne’e,”nia akresenta.

Ho promosaun via online ne’e, Mateus da Costa fiar katak investidór sira sei mai investe tanba iha nasaun globál maka empreza internasionál barak iha interese maibé importante ba Timór mak kontinua promove komunikasaun ho empreza sira.

“Ita tenke esforsu-an maka’as liu atu hala’o promosaun liuhosi semeira sira atu ema hatene potensialidade jeolojia ka mina no gás iha Timor-Leste hodi mai investe tanba kuaze nasaun 32 mak halo mós lansamentu konkursu públiku hanesan ita nian,” nia realsa

ANPM mos halo promosaun ba konkursu públiku ba mina no gás hamutuk bloku 18 ne’e liuhosi konferénsia online ka semeira global (Globál E&P Summit) ne’ebé organiza husi empreza IN-VR Oil & Gas ho sede iha Reinu Unidu.

Iha loron 3 outubru 2019, ANPM ho apoiu hosi IN-VR Oil & Gas realiza simeira internasionál kona-ba petróleu no gás Timor-Leste (Timor-Leste Oil & Gás Summit 2019) no liuhosi seremónia ne’e Governu Timor- Leste liuhosi Primeiru-Ministru Taur Matan Ruak lansa ona konkursu públiku ba mina no gás hamutuk bloku 18.

Mina no gás iha bloku hirak ne’e, nia estrutura fatuk no basia identifika ona liuhosi estudu sízmiku katak kamada fatuk iha potensialidade boot bele akumula petróleu no gás.

Tanba ne’e, Timor-Leste tenke servisu maka’as halo promosaun liuhosi simeira internasionál hodi ema bele mai investe.

IN-VR Oil & Gas maka empreza ida ne’ebé ho sede iha Reinu Unidu, ne’ebé harii iha tinan 2016 ho esperiénsia servisu barak tebes ho entidade governamentál sira atu promove sira-nia inisiativa sira iha setór petróleu, enerjia no minerál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here