Estudante balun halo pratika orientassaun violénsia ba estudante foun sira. Imajen/Espesiál.

DILI, 20 janeiru 2021 (TATOLI)—Ministériu Edukasaun Juventude no Desportu (MEJD) investiga hela kazu krime hasoru estudante foun durante prossesu orientasaun, iha eskola Ensinu Sekundáriu Jerál Públiku (ESGP, sígla portugés) 4 setembru Viqueque.

Ministru Edukasaun Juventude no Desportu, Armindo Maia, hateten prosesu investigasaun la’o hela no parte ministériu rasik hein rezultadu hosi ekipa investigadór sira.

Notísia Relevante:PN husu MEJD hapara prátika orientasaun violénsia ba estudante foun

“Bainhira ita simu informasaun katak iha ESGP 4 setembru Viqueque akontese violénsia iha prosesu orientasaun, ita haruka kedan ekipa investigativu Ministériu nian bá halo investigasaun iha eskola refere,” Armindo Maia hateten ba jornalista sira iha Palásiu Governu, kuarta ne’e.

Governante ne’e hateten, maski parte eskola ho inan-aman sira rezolve ona, maibé problema  ne’ebé konsidera nu’udár krime tenki lori ba oin.

“Antes ne’e ita iha ona sirkulár ne’ebé fó sai katak, eskola hotu-hotu labele uza violénsia iha prosesu orientasaun. Ne’e duni, parte Ministériu buka hadi’a atu labele akontese tan iha futuru,” Ministru ne’e subliña.

Entretantu, iha loron hirak liu-bá, bainhira kazu ne’ebé konsidera krime ne’e akontese, virál tebes iha média sosiál facebook no hetan reasaun makaas hosi públiku.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here