Estudante balun halo pratika orientassaun violénsia ba estudante foun sira. Imajen/Espesiál.

DILI, 19 janeiru 2020 (TATOLI)—Reprezentante povu iha uma fukun Parlamentu Nasionál (PN), husu Ministériu Edukasaun, Juventude no Desportu (MEJD) atu hapara prátika orientasaun violénsia ba estudante foun sira, nune’e prevene pensamentu violénsia iha futuru.

Membru Parlamentu Nasionál, Deputadu Abel Pires da Silva, hateten buat ida orientasaun la’o ho violénsia ne’e, Indonézia nia liafuan karik ne’e “zaman orde baru”, Indonézia rasik mós la uza ona orientasaun modellu hanesan ne’e.

“Se ita hakarak prepara ita-nia oan sira ba futuru hodi tuur iha fatin ida-ne’e (Parlamentu Nasionál), sai líder hodi lori Timor-Leste bá-oin, ita tenke prepara hahú hosi idade tinan 0. Se sira aprende violénsia iha eskola no Estadu tomak nonook de’it no kontinua husik prátika violénsia ne’e la’o, tinan 20 mai tuur iha-ne’e, sira-nia pensamentu ne’e nakonu ho violénsia de’it,” Deputadu bankanda Partidu Libertasaun Populár (PLP), levanta liuhosi plenária, tersa ne’e.

Nia haktuir, orientasaun entre modelu Indonézia ho Austrália nian ninia diferénsa ne’e dook tebes, agora Timor-Leste uza fali prátika ida-ne’ebé Indonézia mós la uza kleur ona tanba foin daudaun sirkula tán vídeu tuan maibé akontese iha eskola territóriu Timor-Leste nian.

“Se ita-nia estudante oan sira halo violénsia ba malu, akontese iha ita-nia oin, ita la halo buat ida, ita la konsege rezolve entaun sá jerasaun ida mak ita prepara liuhosi ita-nia sistema edukasaun ida-ne’e,” Deputadu Abel Pires fó hanoin ba Governu.

Nia sublina, tinan ba tinan violénsia iha eskola akontese beibeik maibé ida-ne’e hanesan prátika ida-ne’ebé estudante foun sira tenke simu, loloos ne’e tenke introdús normalidade ida foun.

“Ha’u lakohi Timoroan hotu-hotu hetan violénsia hosi sira-nia eskola ne’ebé eskola uluk, ne’e tenke para iha eskola pre-sekundária, sekundária no universidade. Tenke para prátika orientasaun ne’e. Ha’u hanoin semana oin ita tenke hapara ida-ne’e,” nia dehan.

Deputadu Bankada PLP ne’e fó ezemplu, iha Áfika ne’ebá la presiza halo funu, estraga de’it mak sistema edukasaun, Timor-Leste labele monu ba situasaun sira hanesan ne’e.

“Orientasaun ne’e tenke introdus buat foun ho kualidade ba estudante foun sira atu aprende. Se ita husik violénsia mak nakonu iha-ne’ebá, valór ida-ne’e mak sei metin iha sira-nia fuan, ne’e, sala,” Deputadu Abel Pires da Silva hateten.

Hatán ba preokupasaun ne’e, Ministru Asuntu Parlamentár no Komunikasaun Sosiál, Francisco Jerónimo, sei enkamiña preokupasaun ne’e ba ministériu relevante.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here