iklan

JUSTISA, LEI, SEGURANSA

F-FDTL ho PNTL investiga ona kazu tiru karau iha Dotik

F-FDTL ho PNTL investiga ona kazu tiru karau iha Dotik

Ema deskoñesidu tiru mate komunidade nia karau iha área Weto, Suku Dotik, Postu Administrativu Alas, Munisípiu Manufahi. Imajen/ Espesiál

DILI, 18 janeiru 2021 (TATOLI) – Autoridade seguransa kompostu hosi FALINTIL-Forsa Defeza Timor-Leste (F-FDTL) ho Polísia Nasionál Timor-Leste (PNTL) Munisipiu Manufahi, hamutuk ho ho autoridade lokál sira halo ona investigasaun ba kazu tiru komunidade nia karau iha área Weto, Suku Dotik, Postu Administrativu Alas, Munisípiu Manufahi.

Membru PNTL no F-FDTL hala’o enkontru ho autoridade lokál hodi buka tuir autór sira ne’ebé tiru mate komunidade nia karau. Imajen/ Simon Nono

Reprezentante Komunidade Suku Dotik nu’udar Misionáriu, Irmaun Simon Nono, informa ba Agéncia TATOLI liuhosi mensajen WhatsApp katak kazu ema deskoñesidu lori kilat tiru mate komunidade nia karau tolu ne’e akontese iha loron 14 janeiru 2021, purvolta tuku 21:20 Otl.

Asaun tiru ne’e rezulta komunidade nia karau tolu mate, no karau rua ema konsege tula ba karreta, no karau ida mate sira husik hela iha fatin akontesimentu.

“Ema deskoñesidu tama mai iha ami nia área Weto, Suku Dotik, lori kilat boot tiru karau komunidade nian. Sira tama mai tiru iha tuku 21:20 Otl hamate karau tolu. Hosi karau tolu ne’e, rua mak  sira tula lori no ida sira la konsege tula mak ami ba buka tuir maka hatán karau mate ona,” Irmaun Simon informa.

Nia dehan, asaun tiru na’ok komunidade nia karau ne’e halo populasaun sira trauma, tanba rona kilat tiru rajada de’it iha kalan.

Simon Nono lori povu Dotik nia naran, husu ba Komandu F-FDTL no Komandu PNTL atu loke prosesu investigasaun ba autór sira ne’e hodi prosesa tuir lei hodi evita kazu hanesan labele akontese iha futuru.

Hafoin akontesimentu, iha loron 16 janeiru, parte ekipa Komandu F-FDTL no PNTL koordena kedas ho autoridade lokál sira hodi buka rekolla evidénsia sira iha terrenu.

Daudaun ne’e parte Polísia Manufahi no F-FDTL kontinua halo investigasaun ba kazu ne’e liuhosi rekolla informasaun hosi sasin sira iha fatin akontesimentu.

PNTL mós foti ona embolku balun ne’ebé autór deskoñesidu uza hodi tiru mate karau hodi submete ba ezame balístiku atu justifika loloos kilat ne’ebé autór sira uza.

Portavós PNTL, Superintendente Xefe, Arnaldo de Araújo, deklara PNTL Manufahi koopera ho F-FDTL no autoridade sira sei kontinua halo investigasaun hodi buka tuir autór sira.

Jornalista : Eugénio Pereira

Editór       : Francisco Simões

iklan
iklan

Leave a Reply

iklan
error: Content is protected !!