Saku plástiku ne’ebé prodús hosi kompañia Handy Plastic. Imajen Tatoli/António Gonçalves

DILI, 18 dezembru 2020 (TATOLI)–Sekretaria Estadu Ambiente (SEA) informa ba públiku, liuliu loja sira katak hahú loron 23 janeiru 2021, Governu liuhosi instituisaun tutela ezekuta ona dekretu-lei númeru 37/2020 kona-ba eliminasaun no importasaum saku plástiku, uzu úniku, embalajen no objetu husi materiál plástiku.

Dekretu-lei ne’e promulga ona husi Prezidente Repúblika (PR), Francisco Guterres ‘Lú Olo’ iha loron 23 setembru 2020 no iha 23 janeiru 2021 entrada ein vigór.

“Hasoru malu ho Primeiru-Ministru hodi relata planu implementasaun polítika jero plástiku, tanba dekretu-lei eliminasaun kombate plástiku Prezidente Repúblika promulga ona iha loron 23 setembru 2020,” Sekretáriu Estadu Ambiente, Demétrio do Amaral de Calvalho, relata hafoin hasoru malu ho Primeiru-Ministru, Taur Matan Ruak, iha Palásiu Governu, sesta ne’e.

Notísia Relevante: Janeiru 2021 autoridade la tolera ona utilizasaun plástiku iha loja

Aleinde ne’e, parte SEA halo ona planu ezekusaun dekretu-lei no informa daudaun ba entidade hotu.

“Tanba ne’e, entidade sira ne’ebé uza embalajen uzu úniku hahú menus no labele importa tan, nune’e 2021 hahú iha loron 23 janeiru mplementa ona dekretu ne’e ho rigór,” nia akresenta.

Membru ezekutivu ne’e akresenta, SEA prodús ona sirkulár ida ne’ebé hola parte mós iha planu ezekusaun dekretu-lei númeru 37/2020.

Iha sirkulár ne’e mensiona, target prinsipál mak atu halo face out ka halo hotu tiha saku sira ne’ebé iha stock hela, nune’e iha loron implementasaun labele uza tan.

Iha loron implementasaun regra foun ne’e, ekipa husi Sekretaria Estadu ne’e sei tun direta atu haree no kuandu entidade sira sei uza nafatin maka sei foti hotu hodi estraga ka halo lakon.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here