Inspetór Jerál bá Jogu sira, Domingos da Costa Guterres. Imajen TATOLI/Francisco Simões

DILI, 08 janeiru 2021 (TATOLI)–Durante tinan 2020 tomak, Inspesaun Jerál ba Jogu sira (IGJ, sigla portugés) hosi Ministériu Turizmu, Komérsiu no Indústria (MTKI) kontribui ona reseita ho valór $1,430,355.30 ba kofre Estadu.

Reseita ne’e IGJ kobre liuhosi taxa sira hosi atividade jogu, ne’ebé hetan ona lisensa hosi Governu ho baze Dekretu-Lei númeru 6/2016, loron 20 abríl, ne’ebé ko’alia kona-ba esplorasaun jogu ho modalidade hanesan jogu slot machine, lotaria populár + Singapura, inklui jogu Toto Bola, Raspadiña no mós jogu tradisionál, hanesan bola guling, futu-manu, bingo, kuru-kuru no seluk tan.

Reseita hosi modalidade jogu Slot Machine 2020. Imajen/IGJ

Inspetór Jerál Jogu, Domingos da Costa Guterres, hateten hosi modalidade jogu ne’e, iha tinan-ida nia laran IGJ konsege kontribui reseita ba kofre Estadu ho montante boot tebes kompara ho instituisaun Estadu sira seluk.

“Iha tinan 2020, reseita ne’ebé IGJ hatama ba Estadu hetan terceiro lugar, kompara ho instituisaun Estadu sira seluk. Maski hatama reseita boot tebes maibé ami enfrenta dezafiu lubuk ida. Tuir loloos reseita bele liu, maibé ami menus rekursu umanu no ekipamentu, entaun kontrolu menus ba área munisípiu no postu administrativu sira. Nune’e fó biban ba jogu ilísitu sira la’o hodi hamenus reseita Estadu,” Inspetór Jogu ne’e informa ba Agência TATOLI, iha ninia knaar fatin, Bebora, Dili, sesta ne’e.

Karik IGJ iha rekursu umanu sufisiente no fasilidade sofistikadu hodi hala’o ninia papél nu’udar órgaun reguladór atividade jogu iha Timor-Leste, maka Responsável ne’e garante bele fó reseita ba Estadu ho montante boot liu.

“Maski ho difikuldade, maibé ami iha vontade hala’o servisu atubele fó reseita ida di’ak ba ita-nia Estadu hosi atividade jogu ne’ebé hetan lisensa hosi Governu,”  nia akresenta.

Reseita ne’ebé IGJ rekolla hodi kontribui ba kofre Estadu, kobre hosi atividade jogu slot machine $820,418.85, Lotaria Populár + Singapura $595,786.44,  jogu tradisionál BG $14,150.00.

Hosi modalidade jogu slot machine, iha operadór tolu mak hetan lisensa legál hosi Governu hanesan Timor Holding S.A, ne’ebé kontribui obrigasaun taxa 25% tuir lei ho valór osan durante 2020 hamutuk $401,790.20, MTG Holding, Lda $413,774.23 no ARL KAPSTAAD, Lda kontribui obrigasaun taxa $4,854.43.

Enkuantu, reseita ne’ebé IGJ kobre hosi modalidade jogu Lotaria Populár + Singapura hosi obrigasaun taxa 10%+15% mai hosi operadór hitu, kompostu hosi kompañia Rudal 7984  ho montante $94,929.47, Amizade Lda $101,281.97, Timor Pool, Lda $35,928.83, Dream Entertaiment S.A $29,909.95, Bedford $263,820.65, Susesu $38,439.02 no Kontente Hamutuk $38,278.61.

Operadór ne’ebé hala’o iha Lotaria Populár Singapura nian maka kompañia Amizade Lda ho Bedford no lotaria versaun nasionál mak iha tolu hanesan Rudal 7984, Dream Entertaiment S.A no Timor Pool.

Tabela reseita hosi modalidade jogu Lotaria Populár + Singapura. Imajen/IGJ

Operadór ne’ebé hala’o jogu ho modalidade Toto Bola maka Kontente Hamutuk, Susesu Hamutuk no KAPSTAAD.

“Governu mós fó lisensa ba operadór  Teddy Lotary, maibé tinan tomak ne’e nia la hala’o nia obrigasaun selu taxa, tanba ne’e IGJ sei fó penalti ba operadór ne’e,” informa Domingos da Costa.

IGJ sei estabelese sentru jogu tradisionál

Haree ba jogu tradisionál ne’ebé eziste la organizadu ho di’ak no difísil atu kontrola hodi kontribui reseita ba Estadu, maka IGJ iha ona estudu no planu atu estabelese sentru jogu tradisionál iha fatin ida de’it, ne’ebé sei loke semana ida dala-rua ka dala-tolu.

“Iha sesta ne’e, proposta ba ideia ne’e, ami enkamiña ona ba Ministru Turizmu Komérsiu no Indústria, José Lucas do Carmo da Silva, espera tinan oin bele iha implementasaun ba prosesu konstrusaun fatin sentru jogu tradisionál,” Inspetór Jogu ne’e informa.

IGJ propoin kria sentru jogu tradisionál atu jogu hanesan futu-manu, bola guling, kuru-kuru,  bingo no seluk tan bele konsentra iha fatin ida, nune’e Governu bele kontrola di’ak no sira bele kontribui reseita ba Estadu no bele kontribui dezenvolve atividade ekonomia seluk hanesan loke kantina ba han-hemu nian, ho kulinária tradisionál.

Dijitaliza jogu lotaria populár

Iha tinan 2021 nia laran, IGJ sei organiza jogu lotaria ba jogu industriál no atualiza sistema manuál ba dijitál atubele kontribui hasa’e reseita barak ba Estadu, nune’e bele kontrola di’ak liu.

“Agora daudaun sistema dijitál prosesa ona, ami haruka ona proposta ba Ministru Turizmu, Komérsiu no Indústria atubele hahú loke konkursu públiku ba fornesimentu sistema dijitalizasaun atubele kontribui servisu ida efikás no efikásia hodi kontrola jogu lotaria sira,” nia subliña.

Jornalista: Francisco Simões

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here