Sekretáriu Estadu Terras no Propriedade, Mário Ximenes. Imajen TATOLI/Egas Cristovão

DILI, 19 janeiru 2021 (TATOLI)–Sekretáriu Estadu Terra no Propriedade, Mário Ximenes, hateten Embaixada sira ne’ebé mak okupa rai Estadu kada fulan tenke selu arrendamentu, ne’ebé daudaun Embaixada Estadu Unidu Amérika (EUA) maka selu arrendamentu boot liu, kompara ho sira seluk.

“Embaixada rua mak ha’u fiksa hela presu arrendamentu, Embaixada Amérika selu arrendamentu kada fulan $12.000 ba Estadu, enkuantu Repúblika Xina $11.000 kada fulan,” Sekretáriu Estadu Mário Ximenes, informa hafoin ramata reuniaun ho Primeiru-Ministru, Taur Matan Ruak, iha Palásiu Governu, tersa ne’e.

Notísia relevante: SETP rekolla millaun $4,2 durante tinan-ida hosi arrendamentu rai Estadu

Governante ne’e dehan, Embaixada rua ne’e okupa rai ho nível klase dahuluk no rai ne’ebé mak boot iha Praia dos Coquieros, Dili, enkuantu ba Embaixada sira seluk selu arrendamentu menus hosi $11.000.

“Ba ema sira ne’ebé uza rai Estadu, kada fulan selu $10 to’o $25ba Estadu,” nia akresenta.

Tuir Mário Ximenes, Governu nia polítika tenke iha rendimentu sustentável tanba ne’e maka nu’udar membru ezekutivu tenke garante polítika atu apoia polítika Governu.

“Daudaun ne’e ami komesa sensibiliza komunidade sira ne’ebé maka uza rai no uma Estadu, tenke rejistu hodi nune’e Estadu bele regula, tanba iha ninia vantajen bainhira Estadu presiza filafali rai ne’ebé maka nia uza ne’e, Estadu bele responsabiliza tanba tuir ona prosedimentu administrativu liuhosi selu arrendamentu kada fulan, kuandu Estadu la presiza rai ne’ebé hela ba laiha buat ida maibé Estadu presiza maka antes foti sei responsabiliza,” Sekretáriu Estadu ne’e esplika.

Jornalista: Antónia Gusmão

Editora: Julia Chatarina   

HAKEREK NO HATÁN

Please enter your comment!
Please enter your name here