Bankada Plataforma Entendimentu kompostu hosi FRETILI, PLP, no KHUNTO, kestiona koerénsia bankada CNRT iha Parlamentu Nasionál liuhosi konferénsia imprensa. Imajen TATOLI/Evaristo Soares Martins.

DILI, 18 janeiru 2021(TATOLI)–Bankada Plataforma Entendimentu ne’ebé kompostu hosi Frente Revolusionária Timor-Leste Independente (FRETILI), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), kestiona koerénsia bankada CNRT ne’ebé hatudu iha uma fukun Parlamentu Nasionál.

“Bankada plataforma hosi partidu tolu hanessan FRETILIN, PLP no KHUNTO kestiona koerénsi bankada CNRT nian, liuliu bainhira haree sira-nia pozisaun ne’ebé beibeik konsidera katak órgaun soberania hotu-hotu nia funsionamentu ladi’ak no kontra regra no konstituisaun no mos dún Prezidente Repúblika viola konstituisaun. Dún tribunál la imparsiál no akuza Governu ho inkapasidade tanba CNRT la kaer ukun,” Reprezentante Bankada Plataforma atuál Vise-Xefe Bankada PLP, Deputadu Francisco de Vasconselos, informa liuhosi konferénsia imprensa, iha PN, segunda ne’e.

Konferénsia imprensa konjunta entre bankada Governu nian ne’e akompaña hosi Xefe Bankada FRETILIN, Deputadu Francisco Miranda Branco no Xefe Bankada KHUNTO, Deputada Olinda Guterres.

Bankada Governu hateten, bainhira partidu CNRT kaer ukun, sira tau ba kotuk regra sira no viola konstituisaun hodi tuir de’it sira-nia interese ba podér polítiku.

anba ne’e, Bankada Governu haree katak pozisaun polítiku Bankada CNRT nian hatudu dezesperu tanba lakon podér ba kaer ukun, nune’e tenta uza meiu oioin atu koko blokeia funsionamentu Estadu nian.

Deputadu Francisco de Vasconselos haktuir, semana hira liubá, Bankada partidu CNRT abandona plenária bainhira debate ba proposta de lei no 23/v(3a) Orsamentu Jerál Estadu 2021, no ikus halo rekursu ba Tribunál Rekursu hodi husu fiskalizasaun abstrata no susesiva konstitusionalidade no legalidade ba norma sira iha artigu balun Lei no 14/2020, de 29 de dezembru.

Bankada Plataforma Governu nian konsidera ida-ne’e nu’udar aktu dezesperu lakon podér hodi kaer ukun hodi tenta blokeia OJE 2021, nu’udar raan Estadu nian hodi hamoris povu nia moris.

Hatán ba kestaun ne’e, Vise-Xefe Bankada CNRT, Deputadu Patrocínio Fernandes, hateten iha kualkér nasaun tenke iha opozisaun hodi kontrola lala’ok Governu nian.

“Justu ka la justu, hotu-hotu bele konfirma katak durante prosesu debate orsamentu, CNRT partisipa ativamente iha parte jeneralidade no CNRT justifika ninia walk out iha plenária liuhosi deklarasaun polítika,” nia dehan.

Tanba, nia hateten, Konsituisaun RDTL prevee katak iha grupu ida naran opozisaun hodi halo kontrolu ba aktu Estadu nian tomak nune’e bele iha balansu ba iha nasaun demokrátiku.  

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here