Juiz Administradór TDD, Afonso Carmona. Imajen Tatoli/Dok.

DILI, 18 janeiru 2021 (TATOLI)-Tribunál Distritál Dili (TDD), durante 2020, finaliza (julgadu)  prosesu kazu sivíl hamutuk 382.

Juiz Administradór TDD, Afonso Carmona, informa  iha 2020 prosesu sivíl ne’ebé tama iha TDD 398 no prosesu pendente hosi 2018-2019 hamutuk 1000.

Notísia Relevante : 2020, Defensoria Públika fó asisténsia ba kazu 4,141

Ba Agéncia TATOLI, ohin, iha kna’ar fatin Mandarin, Dili, Afonso Carmona, hateten, iha 2020 finaliza  prosesu 382 no daudaun iha pendente 1016.

Nia esplika, ba kazu sivíl ne’ebé finaliza ho númeru aas liu mak regulasaun podér paternal (hola malu uniaun defaktu) inan no aman la haree hodi abandona oan sira no tuir mai mak kontratu (hanesan empresta malu osan ho sasán) bainhira la kumpre lori malu ba Tribunál ho kazu rai.

“Kazu sira ne’e nia desizaun balun kondena hodi kumpre regulamentu obrigasaun ne’ebé mak hala’o tiha ona no balun absolve ho  regulasaun paternal  parte sira halo akordu  nune’e Tribunál omóloga,” Afonso Carmona hateten

Tuir dadus hosi TDD kona-ba kazu krime pendente  2019 iha 2054, prosesu tama foun  2020  iha 1502 no durante 2020 finaliza prosesu (julgadu) 1808 no daudaun iha pendente 1748.

Ba prosesu ne’ebé julgadu ka iha desizaun finál hosi  Tribunál nian arguidu sira balun Tribunál aplika pena suspensaun, pena efetivu, selu multa no selu kustu judisiál ho absolve.

Ho estatístika krime ne’ebé aas liu mak violénsia doméstika, ofensa korporais, abuzu seksuál, arma branka, korrupsaun ho sira seluk.

Nia dehan, prosesu sira ne’ebé pendente tanba dalaruma parte sira la marka prezensa tanba ho notifikasaun ne’ebé iha talvés parte arguidu no sasin sira hela dook inklui kestaun sira seluk, maibé daudaun ninia oráriu marka ajenda hotu ona hodi tuir julgamentu iha tinan ne’e.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here